കോട്ടയം: മറിയത്തെ പൊറിഞ്ചു അല്ല പുത്തൻപള്ളി ജോസാണ് കെട്ടിയത്. ജോജു, നൈല ഉഷ, ചെമ്പൻ വിനോദ് എന്നിവർ തകർത്തഭിനയിച്ച സിനിമയിലെ നായിക മറിയത്തെ അല്ല ജോസ് കല്യാണം കഴിച്ചതെന്ന് മാത്രം. കോട്ടയം സ്വദേശി മറിയം തോമസ് ആണ് ജോസായി അഭിനയിച്ച നടൻ ചെമ്പൻ വിനോദിൻ്റെ വധു. സമൂഹമാധ്യമങ്ങളിലൂടെയാണ് താന്‍ വിവാഹിതനായ വിവരം താരം പുറത്തുവിട്ടത്. സൈക്കോളജിസ്റ്റാണ് മറിയം. ആഷിക്ക് അബു, വിജയ് ബാബു, ആൻ അഗസ്റ്റിൻ, അനുമോൾ, രഞ്ജിത് ശങ്കർ തുടങ്ങി നിരവധി താരങ്ങൾ ആശംസകളുമായി എത്തി.
2010 ല്‍ ലിജോ ജോസ് പെല്ലിശ്ശേരി സംവിധാനം ചെയ്ത നായകന്‍ എന്ന ചിത്രത്തിലൂടെയാണ് ചെമ്പൻ വിനോദ് ചലച്ചിത്രമേഖലയിലേക്ക് കടന്നുവന്നത്. സഹനടൻ, വില്ലൻ, നായകൻ തുടങ്ങി ഏത് കഥാപാത്രങ്ങളെയും ഭദ്രമാക്കുന്ന താരത്തിന് 2018 ഗോവ ചലച്ചിത്രമേളയിൽ മികച്ച നടനുള്ള പുരസ്കാരം ലഭിച്ചിരുന്നു. ട്രാൻസ്, ബിഗ് ബ്രദർ എന്നിവയാണ് താരത്തിന്റേതായി ഈ വർഷം റിലീസ് ചെയ്ത ചിത്രങ്ങൾ.
