ആലപ്പുഴ: നഗരത്തിൽ ബിജെപി നേതാവ് രഞ്ജിത്ത് ശ്രീനിവാസൻ വെട്ടേറ്റു കൊല്ലപ്പെട്ട കേസിൽ പ്രതികളുടെ സിസിടിവി ദൃശ്യങ്ങൾ പോലീസ് കണ്ടെത്തി. ആറു ബൈക്കുകളിലായി എത്തിയ 12 പേരാണ് കൊലപാതകം നടത്തിയതെന്നാണ് പോലീസ് അനുമാനം. ഇവർ ബൈക്കിൽ പോകുന്ന ദൃശ്യങ്ങളാണ് പോലീസിന് ലഭിച്ചിരിക്കുന്നത്.
അതേസമയം, രഞ്ജിത്തിന്‍റെ കൊലപാതകവുമായി ബന്ധപ്പെട്ട് 11 പേരെ രാവിലെ പോലീസ് കസ്റ്റഡിയിലെടുത്തിരുന്നു. എസ്ഡിപിഐയുടെ ആംബുലൻസിൽ സഞ്ചരിച്ച നാല് പേരെയും സംശയകരമായ സാഹചര്യത്തിൽ ഏഴ് പേരെയുമാണ് കസ്റ്റഡിയിലെടുത്തിരുന്നത്. നാലംഗ സംഘം സഞ്ചരിച്ച ആംബുലൻസും കസ്റ്റഡിയിലെടുത്തിട്ടുണ്ട്.
ഇവർക്ക് കൊലപാതകവുമായി നേരിട്ട് ബന്ധമുണ്ടോ എന്ന് സ്ഥിരീകരിച്ചിട്ടില്ല. കസ്റ്റഡിയിലായവരെ പോലീസ് വിശദമായി ചോദ്യം ചെയ്തു വരികയാണ്.
