ബെംഗളൂരു: കാമുകനെ ജീവനു തുല്യം പ്രണയിച്ച് രണ്ട് കാമുകിമാരും എത്തിയതോടെ കാമുകനും വെട്ടിലായി. രണ്ട് പേർക്കും കാമുകനെ പിരിയാൻ കഴിയില്ല. രണ്ടു യുവതികളെയും ചതിച്ച 27 കാരനായ യുവാവിനും ആരെ തെരഞ്ഞെടുക്കണമെന്നറിയാതെ ആശയക്കുഴപ്പം. ആരെ വരിക്കണമെന്ന് ഒടുവിൽ തീരുമാനിച്ചത് ടോസിട്ട്.
കർണാടകത്തിലെ ഹാസൻ ജില്ലയിലെ സകലേഷ്പൂരിലാണ് സംഭവം. തർക്കങ്ങൾക്കൊടുവിൽ പഞ്ചായത്തിന്റെ കാർമികത്വത്തിൽ ടോസിട്ട് വിവാഹം നടത്തി. ഒരു വർഷം മുമ്പ് സകലേഷ്പൂരിലെ ഒരു ഗ്രാമത്തിൽ നിന്നുള്ള 27 കാരനായ യുവാവ് അയൽഗ്രാമത്തിലെ 20 വയസ്സുള്ള ഒരു പെൺകുട്ടിയുമായി പ്രണയത്തിലായതോടെയാണ് സംഭവങ്ങളുടെ തുടക്കം.
ഇടക്കിടെ കണ്ടുമുട്ടിയ ഇരുവരും ആരും അറിയാതെ സമയം ചെലവഴിക്കുകയും ചെയ്തിരുന്നു. യാത്രക്കിടെ യുവാവ് ആറുമാസം മുമ്പ് അതേ ഗ്രാമത്തിൽ നിന്നുള്ള മറ്റൊരു പെൺകുട്ടിയുമായി ബന്ധം സ്ഥാപിച്ചു. ആരും അറിയാതെയുള്ള യാത്രകൾ ഇയാൾ ഇവിടെയും ആവർത്തിച്ചു.
അങ്ങനെയിരിക്കെ യുവാവിന്റെ ഒരു ബന്ധു പെൺകുട്ടികളിൽ ഒരാളുമായുള്ള ഇയാളുടെ ബന്ധം കണ്ടുപിടിച്ചു. ഇക്കാര്യം വീട്ടുകാർ ചോദ്യം ചെയ്തതോടെ താൻ പെൺകുട്ടിയുമായി പ്രണയത്തിലാണെന്നും അവളെ വിവാഹം കഴിക്കാൻ ആഗ്രഹിക്കുന്നുവെന്നും യുവാവ് പറഞ്ഞു. എന്നാൽ വീട്ടുകാർ ഇതിനെ എതിർക്കുകയും മറ്റൊരു പെൺകുട്ടിയുമായി വിവാഹം നിശ്ചയിക്കാൻ തീരുമാനിക്കുകയും ചെയ്തു.
പിന്നെ പെട്ടന്നായിരുന്നു വഴിത്തിരിവ്. പെൺകുട്ടികളിൽ ഒരാൾ ഇതിനെക്കുറിച്ച് അറിയുകയും പ്രണയത്തെക്കുറിച്ച് വീട്ടിൽ പറയുകയും ചെയ്തു. പെൺകുട്ടിയുടെ കുടുംബം യുവാവിന്റെ വീട് സന്ദർശിക്കുകയും ബന്ധത്തെക്കുറിച്ച് വീട്ടുകാരെ അറിയിക്കുകയും ചെയ്തു. ഇതിനിടയിൽ മറ്റേ പെൺകുട്ടിയും വിവരം അറിയുകയും അവളുടെ കുടുംബവും യുവാവിന്റെ വീട്ടിൽ എത്തുകയും ചെയ്തു.
പ്രശ്ന പരിഹാരത്തിന് ത്രികോണ പ്രണയം പഞ്ചായത്തിന്റെ മുന്നിൽ എത്തിയത്. ഒരു മാസം മുമ്പ് പഞ്ചായത്ത് വിളിച്ചു ചേർത്തപ്പോൾ ആരെയാണ് വിവാഹം കഴിക്കേണ്ടതെന്ന് യുവാവിനോട് ചോദിച്ചിരുന്നു. വിഷയത്തിൽ യുവതികൾ തമ്മിൽ കടുത്ത തർക്കം ഉണ്ടായെങ്കിലും യുവാവ് മൗനം പാലിച്ചു.
പ്രശ്നം പരിഹരിക്കാനാകാതെ പഞ്ചായത്ത് പിരിഞ്ഞു. കഴിഞ്ഞ ദിവസം രണ്ടാമതും പഞ്ചായത്ത് ചേർന്നാണ് പ്രശ്നം പരിഹരിച്ചത്. ഏത് പെൺകുട്ടിയാണ് യുവാവ് വിവാഹം കഴിക്കേണ്ടതെന്ന് തീരുമാനിക്കാൻ പഞ്ചായത്ത് ഒരു നാണയം ടോസ് ചെയ്യാനും തീരുമാനിക്കുകയായിരുന്നു.പിന്നെ എല്ലാം പെട്ടന്നായിരുന്നു.
