കാക്കനാട്: ഹബായ ഇന്‍ഫോപാര്‍ക്കില്‍ വന്‍ തീപിടിത്തം. ഇടച്ചിറ പാലത്തിന് സമീപം നിര്‍മാണത്തിലിരിക്കുന്ന കെട്ടിടത്തിലാണ് തീപിടിച്ചത്. ജീവനക്കാരടക്കം കെട്ടിടത്തിൽ ഉണ്ടായിരുന്നവർ പെട്ടന്ന് പുറത്തു കടന്നതിനാല്‍ ആളപായം ഒഴിവായി. അഗ്‌നിരക്ഷാസേനയുടെ അഞ്ച് യൂണിറ്റ് എത്തി തീയണച്ചു. വ്യാഴാഴ്ച വൈകീട്ട് 5.30 നാണ് സംഭവം.
കെട്ടിടത്തില്‍ വെല്‍ഡിങ് ജോലിക്കിടെ ഉണ്ടായ തീപ്പൊരി ആളിപ്പടരുകയായിരുന്നു. ഇന്‍റീരിയര്‍ ജോലിക്കും മറ്റുമായി കൂട്ടിയിട്ടിരുന്ന സ്പോഞ്ചുകളിലേക്ക് തീപ്പൊരി വീണ് ആളിക്കത്തുകയായിരുന്നു.
മൂന്ന് മണിക്കൂര്‍ പടര്‍ന്ന് കത്തിയ തീ പ്രദേശത്ത് ദുര്‍ഗന്ധവും അന്തരീക്ഷ മലിനീകരണവുമുണ്ടാക്കി. അഗ്നിബാധ നിയന്ത്രണാതീതമായതോടെ അഗ്‌നിരക്ഷാസേനയെ വിവരം അറിയിച്ചു.
തൃക്കാക്കരയിലെ രണ്ട് യൂണിറ്റ് സ്ഥലത്തെത്തിയെങ്കിലും മതിയായില്ല. തുടര്‍ന്ന് ഗാന്ധിനഗര്‍, ഏലൂര്‍, തൃപ്പൂണിത്തുറ എന്നിവിടങ്ങളില്‍നിന്ന് ഓരോ യൂണിറ്റുകൂടി എത്തി തീയണച്ചു.
