തൃശ്ശൂർ: മെഡിക്കൽ കോളേജിലെ മുപ്പത് എംബിബിഎസ് വിദ്യാർത്ഥികൾക്ക് കൊറോണ സ്ഥിരീകരിച്ചു. ആശുപത്രിയിൽ ഡ്യൂട്ടി ചെയ്തിരുന്ന മെഡിക്കൽ വിദ്യാർത്ഥികൾക്കാണ് വൈറസ് ബാധയുണ്ടായത്.
ഒപ്പം ക്യാംപസിലെ ഇന്ത്യൻ കോഫീ ഹൗസിലെ 13 ജീവനക്കാർക്കും രോഗബാധ സ്ഥീകരിച്ചിട്ടുണ്ട്.
രണ്ട് ബാച്ചുകളിലെ മെഡിക്കൽ വിദ്യാർത്ഥികൾക്കാണ് കൊറോണ ബാധയുണ്ടായത്. ഈ രണ്ട് ബാച്ചിലെ മുഴുവൻ വിദ്യാർത്ഥികളോടും നിരീക്ഷണത്തിൽ പോകാൻ ആവശ്യപ്പെട്ടിട്ടുണ്ട്. ഈ സാഹചര്യത്തിൽ വിദ്യാർത്ഥികളുടെ ഹോസ്റ്റൽ അടയ്ക്കുമെന്നാണ് സൂചന.
കഴിഞ്ഞ ദിവസങ്ങളിൽ ആശുപത്രി ഡ്യൂട്ടിയിലുണ്ടായിരുന്ന വിദ്യാർത്ഥികൾ രോഗികളുമായും കൂട്ടിരിപ്പുകാരുമായും സമ്പർക്കത്തിൽ വന്നിട്ടുണ്ടാവും എന്നത് ആശങ്ക ഇരട്ടിപ്പിക്കുന്നുണ്ട്.
ക്യാംപസിലെ കോഫീ ഹൗസ് ജീവനക്കാരിൽ ഒരാൾ കൊറോണ ബാധിച്ച് മരിച്ചിരുന്നു. തുടർന്നാണ് മുഴുവൻ പേ‍ർക്കും പരിശോധന നടത്തിയത്. ഇതിലാണ് ഇന്ത്യൻ കോഫീ ഹൗസിലെ 13 ജീവനക്കാർക്കും കൊറോണ സ്ഥിരീകരിച്ചത്.
