കൊച്ചി: ജനസംഘം പ്രവർത്തകൻ വാടിക്കൽ രാമകൃഷ്ണനെ വെട്ടിക്കൊലപ്പെടുത്തിയ കേസിൽ മുഖ്യമന്ത്രി പിണറായി വിജയൻ ഒന്നാം പ്രതിയാണെന്ന് കെപിസിസി അധ്യക്ഷൻ കെ.സുധാകരൻ. ഇതിന്റെ എഫ്ഐആറിന്റെ പകർപ്പും അദ്ദേഹം പുറത്ത് വിട്ടു. 1969 ഏപ്രിൽ 21നാണ് ഇദ്ദേഹം രാഷ്ട്രീയകാരണങ്ങളാൽ കൊല്ലപ്പെട്ടത്.
വാടിക്കൽ രാമകൃഷ്ണൻ്റെ കൊലപാതകത്തിന് ശേഷമാണ് കണ്ണൂരിൽ തുടർച്ചയായ രാഷ്ട്രീയ കൊലപാതകങ്ങൾ അരങ്ങേറിയത്. കണ്ണൂർ ജില്ലയിലെ ആദ്യത്തെ രാഷ്ട്രീയ കൊലപാതകമായി കരുതപ്പെടുന്നതാണ് വാടിക്കൽ രാമകൃഷ്ണന്റേത്. ബിജെപിയുടെ പഴയ രൂപമായ ജനസംഘത്തിന്റെ പ്രവർത്തകനായിരുന്നു വാടിക്കൽ രാമകൃഷ്ണൻ.
സർക്കാർ നേരിടുന്ന അഴിമതി കേസുകൾ മറയ്ക്കാനാണ് തനിക്ക് എതിരായ ആരോപണങ്ങളെന്നും പിണറായി ആരാണെന്ന് കേരളത്തിലെ ജനങ്ങൾ വിലയിരുത്തുമെന്നും കെ.സുധാകരൻ പറഞ്ഞു.
സിപി എം ഭീഷണിയിലൂടെയാണ് താൻ വളർന്നതെന്നും തനിക്ക് നേരെ മൂന്ന് തവണ വധശ്രമമുണ്ടായെന്നും അദ്ദേഹം പറഞ്ഞു. കൊലക്കേസുകൾ തെളിയിച്ചാൽ താൻ കെപിസിസി അധ്യക്ഷ സ്ഥാനം രാജിവയ്ക്കുമെന്നും കെ സുധാകരൻ പറഞ്ഞു.
