ചങ്ങനാശേരി: ശബരിമല വിഷയത്തിൽ ഇടതുവിമർശനം അതിരുകടക്കുന്നുവെന്ന് എൻഎസ്‌എസ്. രാഷ്ട്രീയനിലപാടിൻ്റെ പേരിലല്ല ശബരിമല വിഷയത്തിൽ എൻഎസ്‌എസ് ഇറങ്ങിത്തിരിച്ചത്. പാർലമെൻറി മോഹങ്ങൾ എൻഎസ്‌എസിനോ നേതാക്കൾക്കോ ഇല്ലെന്നും ജനറൽ സെക്രട്ടറി ജി.സുകുമാരൻ നായർ പറഞ്ഞു.
വിശ്വാസം, ആചാരം എന്നിവ സംരക്ഷിക്കാൻ മറക്കുന്നവർക്ക് തിരിച്ചടിയുണ്ടാകും. വിശ്വാസം സംരക്ഷിക്കുന്നവർക്കൊപ്പമാണ് എന്നും എൻഎസ്‌എസ്. അതിൽ രാഷ്ട്രീയം കാണുന്നില്ല. ഇടതു വിമർശനങ്ങളെ തളളിക്കളയുന്നുവെന്നും ജി സുകുമാരൻ നായർ കൂട്ടിച്ചേർത്തു.
ബഹുഭൂരിപക്ഷം ജനങ്ങളും അവരുടെ വിശ്വാസത്തെയും ആചാരാനുഷ്ഠാ നങ്ങളെയും ജീവവായു പോലെയാണ് കരുതുന്നത്. അധികാരത്തിന്റെ തള്ളലിൽ ഇത് മറന്നുപോകുന്നവർക്ക് തിരിച്ചടി ഉണ്ടാകും. ശബരിമല വിഷയത്തിന്റെ പേരിൽ സംഘടനയ്‌ക്കെതിരായുള്ള ചില ഇടതുപക്ഷനേതാക്കളുടെ വിമർശനം അതിരുകടക്കുന്നതായും എൻ.എസ്.എസ് പുറത്തിറക്കിയ വാർത്താക്കുറിപ്പിൽ പറയുന്നു.
എൻ.എസ്.എസിന്റെ നിലപാട് വിശ്വാസവും ആചാരാനുഷ്ഠാനവും സംരക്ഷിക്കുക എന്നതാണ്. ഏതെങ്കിലും രാഷ്ട്രീയനിലപാടിന്റെ അടിസ്ഥാനത്തിലല്ല അതിനുവേണ്ടി ആദ്യം മുതൽ ഇറങ്ങിത്തിരിച്ചത്. സംഘടനയ്‌ക്കോ, സംഘടനാ നേതൃത്വത്തിലുള്ള വർക്കോ പാർലമെന്ററിമോഹങ്ങളൊന്നുംതന്നെയില്ല.
സ്ഥാനമാനങ്ങൾക്കോ രാഷ്ടീയ നേട്ടങ്ങൾക്കോ വേണ്ടി ഏതെങ്കിലും സർക്കാരുകളുടെയോ രാഷ്ട്രീയനേതാക്കളുടെയോ പടിവാതിൽക്കൽ പോയിട്ടില്ല. വിശ്വാസസംരക്ഷണത്തിനും സാമൂഹ്യനീതിക്കും വേണ്ടിയാണ് ഇന്നോളം നിലകൊണ്ടിട്ടുള്ളത്. എന്നും വിശ്വാസം സംരക്ഷിക്കുന്നവർക്കൊപ്പമാണ്, അതിൽ രാഷ്ട്രീയം കാണുന്നില്ലെന്നും എൻ.എസ്.എസ് പറയുന്നു.
