ചെന്നൈ: പൂണെ സിറം ഇൻസ്റ്റിറ്റ്യൂട്ടിന്റെ കോവിഷീൽഡ് വാക്സിൻ നിരോധിക്കണമെന്ന ഹർജിയിൽ മദ്രാസ് ഹൈക്കോടതി കേന്ദ്രത്തിന് നോട്ടീസ് അയച്ചു. കോവിഷീൽഡ് വാക്സിൻ സുരക്ഷിതമല്ലെന്ന് ചൂണ്ടിക്കാട്ടിയുള്ള ഹർജിയിലാണ് നോട്ടീസ്.
കോവിഷീൽഡ് വാക്സിൻ സ്വീകരിച്ചതിന് ശേഷം ആരോഗ്യപ്രശ്നങ്ങൾ ഉണ്ടായെന്നും ഇതിനു നഷ്ടപരിഹാരമായി 5 ലക്ഷം രൂപ നഷ്ടപരിഹാരം നൽകണമെന്നും ആവശ്യപ്പെട്ട് ചെന്നൈ സ്വദേശിയാണ് മദ്രാസ് ഹൈക്കോടതിയിൽ ഹർജി നൽകിയത്.
രാജ്യത്തെ കൊറോണ വാക്സിൻ സ്വീകരിച്ചവരുടെ എണ്ണം ഒരു കോടി കടന്നതിന് പിന്നാലെയാണ് വ്യാപകമായി ഉപയോഗിക്കപ്പെട്ട കൊവിഷിൽഡ് വാക്സിനെതിരെ കോടതിയിൽ ഹര്‍ജി എത്തിയത്.
