കൊച്ചി: ബിപിസിഎല്‍ വില്‍പ്പനയെ പരോക്ഷമായി പരാമര്‍ശിച്ച് പ്ലാന്‍റ് ഉദ്ഘാടന ചടങ്ങില്‍ മുഖ്യമന്ത്രി പിണറായി വിജയന്‍. സ്വകാര്യ നിക്ഷേപം ആകര്‍ഷിച്ച് മാത്രമല്ല വ്യവസായ വികസനമെന്നും വികസന പദ്ധതികളില്‍ കേന്ദ്രവുമായി സഹകരിക്കാന്‍ സംസ്ഥാനം സന്നദ്ധമെന്നും മുഖ്യമന്ത്രി അറിയിച്ചു. വേഗതയും സുരക്ഷിതത്വവുമുള്ള ഗതാഗത സൗകര്യങ്ങള്‍ ആധുനിക സമൂഹത്തിന് ഒഴിച്ചുകൂടാന്‍ കഴിയാത്തതാണ്. ഇവ വ്യാവസായിക വളര്‍ച്ചക്ക് അടിത്തറയൊരുക്കും.
കേരളത്തില്‍ ഉള്‍നാടന്‍ ജലാശയങ്ങള്‍ ഗതാഗത യോഗ്യമാക്കുന്നത് ചെലവും മലിനീകരണവും കുറഞ്ഞ ഗതാഗത സൗകര്യത്തിന് വഴിയൊരുക്കുമെന്നും അദ്ദേഹം പറഞ്ഞു. പ്രധാനമന്ത്രി നരേന്ദ്രമോദി പങ്കെടുത്ത ബിപിസിഎല്‍ പ്ലാന്‍റ് ഉദ്ഘാടന ചടങ്ങില്‍ സംസാരിക്കുകയായിരുന്നു അദ്ദേഹം.
കഴിഞ്ഞ നാലര വര്‍ഷമായി സംസ്ഥാനത്ത് വ്യവസായ വളര്‍ച്ചയുണ്ടാക്കാനുള്ള ശ്രമങ്ങള്‍ സംസ്ഥാന സര്‍ക്കാര്‍ നടത്തി. സ്വകാര്യനിക്ഷേപം ആകര്‍ഷിച്ചുകൊണ്ട് മാത്രമല്ല, വ്യവസായ അഭിവൃദ്ധിയുണ്ടാക്കേണ്ടത്. പൊതുമേഖലയെ ശാക്തീകരിച്ചും പരമ്പരാഗത മേഖലകളെ നവീകരിച്ചും അവ സാധ്യമാക്കണമെന്നും അദ്ദേഹം പറഞ്ഞു.
