കൊല്ലം: ഉപേക്ഷിച്ച നിലയിൽ കണ്ടെത്തിയ നവജാത ശിശു മരിച്ചു. ചൊവ്വാഴ്ച വൈകിട്ടോടെ തിരുവനന്തപുരം എസ്‌എടി ആശുപത്രിയിലാണ് കുട്ടി മരിച്ചത്. ഹൃദയ സംബന്ധമായ അസുഖമുള്ള കുട്ടിയായിരുന്നുവെന്ന് ആശുപത്രി അധികൃതർ അറിയിച്ചു. മൃതദേഹം പോസ്റ്റുമോർട്ടത്തിനായി മോർച്ചറിയിലേയ്ക്കു മാറ്റി.

കല്ലുവാതുക്കൽ ഊഴിയാക്കോട് ക്ഷേത്രത്തിന് സമീപം വീട്ടുപറമ്പിലെ കരിയിലക്കൂട്ടത്തിനിടയിൽ ചൊവ്വാഴ്ച രാവിലെ ആറരയോടെയാണ് കുഞ്ഞിനെ കണ്ടെത്തിയത്. പൊക്കിൾകൊടി പോലും മുറിച്ചുമാറ്റാത്ത രീതിയിലായിരുന്നു കുഞ്ഞിനെ ഉപേക്ഷിച്ചത്. രണ്ടുദിവസം പ്രായമുള്ള മൂന്ന് കിലോ തൂക്കമുള്ള ആൺകുഞ്ഞിനെയാണ് ഉപേക്ഷിച്ച നിലയിൽ കണ്ടെത്തിയത്.

ഉറുമ്പരിക്കാനും തുടങ്ങിയിരുന്നുവെന്ന് പ്രദേശവാസികൾ അറിയിച്ചു. കുഞ്ഞിനെ പോലീസ് ഏറ്റെടുത്ത് പാരിപ്പള്ളി മെഡിക്കൽ കോളേജ് ആശുപത്രിയിൽ എത്തിച്ച ശേഷം വിദഗ്ധ ചികിത്സയ്ക്കായി എസ് എ ടി യിലേയ്ക്ക് മാറ്റുകയായിരുന്നു.