തിരുവനന്തപുരം: മുഖ്യ തെരഞ്ഞെടുപ്പ് കമ്മീഷണര്‍ ടിക്കാറാം മീണക്ക് തദ്ദേശ തെരഞ്ഞെടുപ്പില്‍ വോട്ടില്ല. വോട്ടര്‍ പട്ടികയില്‍ പേരില്ലാത്തിതിനാല്‍ കലക്ടര്‍ക്ക് പരാതി നല്‍കുമെന്ന് ടിക്കാറാം മീണ പറഞ്ഞു.പൂജപ്പുര വാര്‍ഡിലായിരുന്നു ടിക്കാറാം മീണ ലോക്സഭ തെരഞ്ഞെടുപ്പില്‍ വോട്ട് രേഖപ്പെടുത്തിയത്.
നിയമസഭാ ലോക്സഭാ തെരഞ്ഞെടുപ്പുകളുടെ സംസ്ഥാനത്തിൻ്റെ ചുമതലയുള്ള ഉദ്യോഗസ്ഥനാണ് ടിക്കാറാം മീണ.
ടിക്കാറാം മീണ താമസിക്കുന്നത് പൂജപ്പുര – ജഗതി വാര്‍ഡുകള്‍ക്കിടയിലുള്ള തിരുമില്യനയം അപ്പാര്‍ട്‌മെന്റിലാണ്.
അദ്ദേഹത്തിന്റെ വോട്ട് പൂജപ്പുര വാര്‍ഡിലാണ്. എന്നാല്‍ ഇന്നലെ മാത്രമാണ് തന്റെ വോട്ട് ഏത് സ്‌കൂളിലാണെന്ന് അന്വേഷിക്കാന്‍ ഉദ്യോഗസ്ഥരോട് അദ്ദേഹം ആവശ്യപ്പെട്ടത്. കഴിഞ്ഞ നിയമസഭാ തെര‍ഞ്ഞെടുപ്പിൽ അദ്ദേഹം വോട്ട് ചെയ്തിരുന്നു.
മുതിര്‍ന്ന കോണ്‍ഗ്രസ് നേതാവും മുൻ മുഖ്യമന്ത്രിയുമായ എ.കെ. ആന്‍റണി തദ്ദേശ തെരഞ്ഞെടുപ്പില്‍ വോട്ട് രേഖപ്പെടുത്തില്ല. കൊറോണ ബാധിച്ചതിനെ തുടര്‍ന്നുള്ള ശാരീരിക അവശതകൾ കാരണമാണ് ഇക്കുറി അദ്ദേഹത്തിന് വോട്ട് ചെയ്യാന്‍ സാധിക്കാതിരുന്നത്. നിലവില്‍ അദ്ദേഹം ഡെല്‍ഹിയില്‍ വിശ്രമത്തിലാണ്. ആലപ്പുഴ ജില്ലയിലെ ചേര്‍ത്തലയിലാണ് അദ്ദേഹത്തിന് വോട്ടുള്ളത്.
അതേസമയം, മുന്‍മുഖ്യമന്ത്രി വി.എസ് അച്യുതാനന്ദനും വോട്ട് ചെയ്യില്ല. യാത്ര ചെയ്യാനുള്ള ബുദ്ധിമുട്ടുകളെ തുടര്‍ന്നാണ് അദ്ദേഹത്തിന് വോട്ട് ചെയ്യാന്‍ സാധിക്കാത്തത്. നിലവില്‍ അദ്ദേഹം തിരുവനന്തപുരത്താണ്.
