കൊച്ചി: സ്റ്റാര്‍ പദവിക്കായി ടൂറിസം വകുപ്പ് ഉദ്യോഗസ്ഥര്‍ക്ക് കോഴ നല്‍കിയെന്ന കണ്ടെത്തലിനെ തുടർന്ന് ഹോട്ടലുകളിലും ഏജന്‍റുമാരുടെ വീടുകളിലും സിബിഐ റെയ്ഡ്. കേന്ദ്ര ടൂറിസം ഉദ്യോഗസ്ഥര്ക്കാണ് കോഴ നല്‍കിയത്. റിപ്പോര്‍ട്ടിന്‍റെ അടിസ്ഥാനത്തില്‍ കേരളത്തിലെ ഹോട്ടലുകളിലും ഏജന്‍റുമാരുടെ വീടുകളിലും സിബിഐ നടത്തിയ മിന്നല്‍ പരിശോധനയിലാണ് 55 ലക്ഷം രൂപ കണ്ടെടുത്തത്.
ഇന്ത്യ ടൂറിസം ചെന്നൈ റീജിയണല്‍ ഡയറക്ടര്‍ സജ്ഞയ് വാട്‌സിനും അസിസ്റ്റന്‍റ് ഡയറക്ടര്‍ രാമകൃഷ്ണനെയും കേന്ദ്രീകരിച്ചാണ് അന്വേഷണം പുരോഗിമിക്കുന്നത്.
ബുധനാഴ്ച പുലര്‍ച്ചെ സഞ്ജയ് വാട്‌സിന്‍ ചെന്നൈയിലേക്ക് പോകാന്‍ കൊച്ചി വിമാനത്താവളത്തിലേക്ക് വരുന്ന വഴിയില്‍ വച്ചാണ് സിബിഐ ഉദ്യോഗസ്ഥര്‍ കാർ തടഞ്ഞ് നിര്‍ത്തി ഫോണ്‍ പരിശോധിച്ചത്. തുടർന്ന ലഭിച്ച വിവരത്തിന്‍റെ അടിസ്ഥാനത്തിലാണ് റെയ്ഡ് നടത്തിയത്. ഇരുവരെയും സിബിഐ നാളുകളായി നിരീക്ഷിച്ചു വരികയായിരുന്നു. രണ്ട് ഉദ്യോഗസ്ഥര്‍ക്കും അനധികൃത സ്വത്തുള്ളതായി സിബിഐ കണ്ടെത്തിയിട്ടുണ്ട്.
ഇയാളുടെ ഫോണില്‍ നിന്ന് ഏജന്‍റുമാര്‍ ബന്ധപ്പെട്ടതിന്‍റെയും മറ്റു കോഴ ഇടപാടിന്‍റെയും വിവരങ്ങള്‍ സിബിഐക്ക് ലഭിച്ചു. ചെന്നൈയിലുള്ള ഇന്ത്യ ടൂറിസത്തിന്‍റെ റീജിയണല്‍ ഓഫീസാണ് കേരളം ഉള്‍പ്പടെയുള്ള സംസ്ഥാനങ്ങളിലെ ബാറുകള്‍ക്കും ഹോട്ടലുകള്‍ക്കും സ്റ്റാര്‍ പദവി നല്‍കുന്നത്.
അടിസ്ഥാന സൗകര്യം പോലുമില്ലാത്ത ഹോട്ടലുകള്‍ക്ക് സ്റ്റാര്‍ പദവി നല്‍കിയെന്നാണ് അന്വേഷണ സംഘത്തിന്‍റെ കണ്ടെത്തല്‍.
തമിഴ്‌നാട്ടിലെ ഇവരുടെ വസതികളിലും മറ്റും സിബിഐ കഴിഞ്ഞ ദിവസം റെയ്ഡ് നടത്തിയതായാണ് വിവരം. ഇവരെ പ്രതിചേര്‍ത്ത് സിബിഐയുടെ അന്വേഷണം പുരോഗമിക്കുകയാണ്.
