ശ്രീനഗര്‍ : അതിർത്തിയിൽ വീണ്ടും വെടിനിര്‍ത്തല്‍ കരാര്‍ ലംഘനം. ജമ്മു കശ്മീരിലെ പൂഞ്ച് ജില്ലയിൽ പാക്കിസ്ഥാനി സൈന്യം വീണ്ടും വെടിനിർത്തൽ കരാർ ലംഘിച്ചു. പാക് വെടിവെയ്പ്പിൽ ഒരു ഇന്ത്യന്‍ ജവാന് വീരമൃത്യു സംഭവിച്ചതായി സൈനിക വൃത്തങ്ങൾ അറിയിച്ചു.
അതിർത്തിക്കപ്പുറത്തുനിന്നുള്ള വെടിവയ്പ്പിൽ ലാൻസ് നായിക് കർണെയിൽ സിങ്ങാണു വീരമൃത്യു വരിച്ചത്. മറ്റൊരു സൈനികന് പരിക്കേറ്റതായും റിപ്പോർട്ടുണ്ട്. ഇന്ത്യൻ സേന ശക്തമായി തിരിച്ചടിച്ചതായി സൈന്യം വ്യക്തമാക്കി.
പാക് സൈന്യം യാതൊരു പ്രകോപനമില്ലാതെയാണ് ആക്രമണം അഴിച്ചുവിട്ടത്. മോര്‍ട്ടാര്‍ ഷെല്ലാക്രമണവും വ്യാപക വെടിവയ്പ്പും നടത്തിയെന്നും പ്രതിരോധ വക്താവ് വ്യക്തമാക്കി. മാന്‍കോട്ട് മേഖലയെയും കുഗ്രാമങ്ങളെയും ലക്ഷ്യമിട്ട് കഴിഞ്ഞ മൂന്ന് ദിവസമായി പാക്കിസ്ഥാന്‍ അക്രമം അഴിച്ചു വിടുകയാണ്.
സെപ്റ്റംബറില്‍ 46 തവണ പാക് സൈന്യം കരാര്‍ ലംഘിച്ചതെന്നും പ്രതിരോധ വക്താവ് കൂട്ടിച്ചേർത്തു. സെപ്റ്റംബര്‍ അഞ്ചിന് പാക് സൈന്യം നടത്തിയ വെടിവയ്പ്പില്‍ രജൗരി ജില്ലയിലെ സുന്ദര്‍ബാനി സെക്ടറില്‍ ഒരു സൈനികന് വീരമൃത്യു വരിച്ചിരുന്നു. മൂന്ന് ഉദ്യോഗസ്ഥര്‍ക്ക് പരിക്കേറ്റിരുന്നു.
