ന്യൂഡെല്‍ഹി: ഡെല്‍ഹി എയിംസ് ആശുപത്രിയിലെ മുതിര്‍ന്ന ഡോക്ടര്‍ കൊറോണ ബാധിച്ച്‌ മരിച്ചു. എയിംസിലെ ശ്വാസകോശ വിഭാഗം ഡയറക്ടറായിരുന്ന ഡോ. ജിതേന്ദ്രനാഥ് പാണ്ഡേ (78) ആണ് മരിച്ചത്. ഇതേ വിഭാഗത്തിലാണ് കൊറോണ ബാധിതരുടെ ചികിത്സ നടക്കുന്നത്. ഡെല്‍ഹിയിലെ മുതിര്‍ന്ന ഡോക്ടറായ സംഗീത റെഡ്ഡിയാണ് ഡോ. ജിതേന്ദ്രനാഥ് പാണ്ഡേയുടെ മരണം ട്വിറ്ററിലൂടെ സ്ഥിരീകരിച്ചത്.
എയിംസ് പള്‍മോണോളജി ഡിപ്പാര്‍ട്ട്മെന്‍റ് പ്രഫസറും ഡയറക്ടറുമായിരുന്നു ജിതേന്ദ്ര. ആഴ്ചകളായി ഇദ്ദേഹം കൊറോണ രോഗികളെ ചികിത്സിച്ചുവരികയായിരുന്നു. കഴിഞ്ഞ ദിവസം എയിംസിലെ ഒരു മെസ് ജോലിക്കാരന്‍ കൊറോണ ബാധിച്ച്‌ മരിച്ചിരുന്നു. തലസ്ഥാനത്ത് നിരവധി ഡോക്ടര്‍മാരും നഴ്സുമാരുമാണ് കോവിഡ് രോഗബാധിതരായത്. മഹാരാഷ്ട്രയ്ക്കും തമിഴ്നാടിനും ഗുജറാത്തിനും പിന്നില്‍ ഏറ്റവും കൂടുതല്‍ പേര്‍ക്ക് കൊറോണ സ്ഥിരീകരിച്ച ഇടമാണ് ഡൽഹി.
നിരവധി ആരോഗ്യ പ്രവര്‍ത്തകര്‍ക്കും ഇവിടെ കൊറോണ സ്ഥിരീകരിച്ചിട്ടുണ്ട്. കൊറോണ രോഗികളുടെ എണ്ണം വര്‍ധിച്ച സാഹചര്യത്തിൽ ദില്ലിയിലെ തീവ്ര ബാധിത മേഖലകളുടെ എണ്ണം 78 ൽ നിന്ന് 92 ആയി കൂടി. 24 മണിക്കൂറിനിടെ ദില്ലിയില്‍ 591 പേർക്കാണ് രോഗം ബാധിച്ചത്. ഇതോടെ ആകെ രോഗബാധിതരുടെ എണ്ണം 12910 ആയി ഉയര്‍ന്നു.
