തിരുവനന്തപുരം: ഹോം സിനിമയ്ക്ക് സംസ്ഥാന ചലച്ചിത്ര പുരസ്‌കാരം കിട്ടാത്തതിനെച്ചൊല്ലിയുള്ള വിവാദം അനാവശ്യമെന്ന ജൂറി ചെയര്‍മാന്‍ സയിദ് മിര്‍സ. സിനിമ ജൂറി കണ്ടുകാണില്ലെന്ന നടന്‍ ഇന്ദ്രന്‍സിന്റെ ആരോപണം തെറ്റാണൈന്ന് സയിദ് മിര്‍സ പറഞ്ഞു.
ജൂറി പൂര്‍ണമായും സിനിമ കണ്ടിരുന്നു. ഒരു വിഭാഗത്തിലും ഹോം അവസാന ഘട്ടത്തില്‍ എത്തിയില്ല. അവാര്‍ഡ് പൂര്‍ണമായും ജൂറിയുടെ തീരുമാനമാണ്. അതിനെച്ചൊല്ലിയുള്ള വിവാദം അനാവശ്യമാണ്- സയിദ് മിര്‍സ പറഞ്ഞു.
എന്നാൽ തനിക്ക് അവാര്‍ഡ് ലഭിക്കാത്തതില്‍ വിഷമമില്ലെന്നും ഹോമിന് പുരസ്‌കാരം പ്രതീക്ഷിച്ചിരുന്നെന്നും ഇന്ദ്രന്‍സ് പറഞ്ഞു. ജൂറി സിനിമ കണ്ടുകാണില്ലെന്നാണ് എനിക്ക് തോന്നുന്നത്, ഹൃദയത്തോടൊപ്പം ഹോമും ചേര്‍ത്തുവയ്ക്കാമായിരുന്നില്ലേ?, ഇന്ദ്രന്‍സ് ചോദിച്ചു.
എനിക്ക് അവാര്‍ഡ് ലഭിക്കാത്തതില്‍ അങ്ങനെ വിഷമമില്ല, കിട്ടിയതെല്ലാം നമുക്ക് വേണ്ടപ്പെട്ടവര്‍ക്കാണ്, അവരുടെയൊക്കെ ആരാധകനാണ് ഞാന്‍. അതുകൊണ്ട് അത് വലിയ സന്തോഷമാണ്. എനിക്ക് കിട്ടിയതുപോലെതന്നെയാണ്. ഹോമിന് എന്തെങ്കിലും അംഗീകാരം കിട്ടുമെന്നായിരുന്നു പ്രതീക്ഷ. അത് ആളുകളെല്ലാം പറഞ്ഞ് കൊതിപ്പിച്ചതാണ്. അതൊരു വിഷമമാണ്. എനിക്ക് തോന്നുന്നു ജൂറി സിനിമ കണ്ടുകാണില്ലെന്ന്, ഇന്ദ്രന്‍സ് പറഞ്ഞു.