ആലപ്പുഴ: രാമങ്കരിയിൽ വാട്ടർ ടാങ്കിന് മുകളിൽ കയറി മധ്യവയസ്‌കന്‍റെ ആത്മഹത്യാ ഭീഷണി. കുട്ടനാട് ഊരുക്കരി സ്വദേശി ട്രിബിലിയാണ് നാട്ടുകാരെ മൂന്ന് മണിക്കൂറോളം ആശങ്കയിലാഴ്ത്തിയയത്. പെട്രോൾ നിറച്ച കുപ്പിയും കയറുമായിട്ടായിരുന്നു ഭീഷണി.
കുടുംബപ്രശ്‌നങ്ങളെ തുടർന്നുള്ള കേസിൽ കുടുക്കാൻ ശ്രമിക്കുന്നു എന്ന കാരണം പറഞ്ഞാണ് ആത്മഹത്യാ ഭീഷണി മുഴക്കിയത്. രാമങ്കരി പൊലീസും അഗ്നിശമന സേനാംഗങ്ങളും ശ്രമിച്ചിട്ടും താഴെയിറങ്ങാൻ കൂട്ടാക്കാതിരുന്ന ഇയാൾ മകൾ എത്തിയതോടെയാണ് താഴെയിറങ്ങിയത്.
ഇയാളുടെ ഭാര്യയും സഹോദരിയും നേരത്തേ സ്ഥലത്തെത്തിയിരുന്നു. മകളെ കാണണമെന്നായിരുന്നു ഇയാളുടെ ആവശ്യം. തുടർന്നാണ് മകൾ സ്ഥലത്തെത്തിയത്.
പരസ്പര വിരുദ്ധമായാണ് ഇയാൾ സംസാരിക്കുന്നതെന്ന് പോലീസ് പറഞ്ഞു. കുടുംബവഴക്കിനെ തുടർന്നു ഇയാൾക്കെതിരെ നേരത്തെ പോലീസ് കേസെടുത്തിരുന്നു. തന്നെ കുടുക്കിയതാണെന്നും അതെല്ലാം ഒത്തു തീർപ്പാക്കിയതാണെന്നും ഇയാൾ പറയുന്നുണ്ടെന്നും പോലീസ് അറിയിച്ചു.
