കാസർകോട്: പെട്ടെന്ന് റോഡിലേക്ക് ഇറങ്ങി ഓടിയ കൊച്ചു കുട്ടിയെ രക്ഷിക്കാൻ ശ്രമിക്കുന്നതിനിടെ മൂന്നാം ക്ലാസ്സ്‌ വിദ്യാര്‍ഥിനിക്ക് ദാരുണാന്ത്യം. കൈതക്കാട് എയുപി സ്കൂള്‍ മൂന്നാം ക്ലാസ് വിദ്യാര്‍ഥിനി ഷഹ്ന (8) യാണ് റോഡിലേക്ക് ഇറങ്ങി ഓടിയ കുട്ടിയെ രക്ഷിക്കുന്നതിനിടയിൽ മരിച്ചത്. ചെറുവത്തൂർ പയ്യങ്കി തഖ്വ ജുമാ മസ്ജിദിന് സമീപം ഓട്ടോ ഇടിച്ചായിരുന്നു വിദ്യാര്‍ഥിനിയുടെ ദാരുണ അന്ത്യം.
ഇന്നലെ വൈകുന്നേരം നാലു മണിയോടെ ആയിരുന്നു അപകടം. വീട്ടില്‍ നിന്ന് റോഡിലേക്ക് ഇറങ്ങി ഓടിയ കൊച്ചു കുട്ടിയെ എടുക്കാന്‍ ഷഹ്ന റോഡിലേക്ക് ഇറങ്ങുകയായിരുന്നു. അപ്പോഴാണ് എതിർ വശത്തു നിന്ന് വന്ന ഓട്ടോ ഷഹ്‌നയെ ഇടിച്ചത്. ഉടന്‍ ചെറുവത്തൂര്‍ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
