തൃശൂർ: മെഗാസ്റ്റാർ മമ്മൂട്ടിയോട് കടുത്ത ആരാധനവച്ചു പുലർത്തി വാർത്തകളിൽ ഇടം നേടിയ തൃശൂർ പൂങ്കുന്നം വടാശ്ശേരി വീട്ടിൽ ‘മമ്മൂട്ടി സുബ്രൻ’ എന്ന സുബ്രഹ്മണ്യൻ നിര്യാതനായി. മമ്മൂട്ടിയെ നായകനാക്കി സിനിമയെടുക്കാൻ 16 ലക്ഷം രൂപയുടെ ലോട്ടറി ടിക്കറ്റുകളെടുത്തും ശങ്കരംകുളങ്ങര അമ്പലത്തിന്‍റെ ജംഗ്​​ഷനിലെ ആലിൻ ചുവട്ടിൽ ദൈവങ്ങളുടെ ചിത്രത്തിനൊപ്പം മമ്മൂട്ടിയുടെ ഫോട്ടോയും വച്ചും പൂജിച്ചതും വാർത്തകളായിട്ടുണ്ട്. ചുമട്ടുതൊഴിലാളിയായ സുബ്രൻ്റെ മമ്മൂട്ടിയോടുള്ള ഭ്രാന്തമായ ആരാധന കണ്ട്​ നാട്ടുകാർ ഇട്ട വിളിപ്പേരാണ്​ ‘മമ്മൂട്ടി സുബ്രൻ’.

ശനിയാഴ്ച രാത്രി ശ്വാസതടസ്സം അനുഭവപ്പെട്ടതിനെ തുടർന്ന് നാട്ടുകാരാണ്​ സുബ്രനെ ജില്ലാ ആശുപത്രിയിൽ എത്തിച്ചത്​. ആശുപത്രിയിൽ എത്തി അൽപസമയത്തിനുള്ളിൽ മരിക്കുകയും ചെയ്​തു. 16ാം വയസ്സിൽ സിനിമ കണ്ടുതുടങ്ങിയ കാലം മുതൽ മമ്മൂട്ടി മാത്രമാണ്​ സുബ്രഹ്മണ്യന്‍റെ മനസ്സിൽ. പകൽ മുഴുവൻ ചുമട് എടുത്തുകിട്ടുന്ന പണം മുഴുവൻ വൈകുന്നേരങ്ങളിൽ മമ്മൂട്ടി സിനിമ കാണാനാണ്​ സുബ്രൻ വിനിയോഗിച്ചിരുന്നത്​.

‘ഒരു വടക്കൻ വീരഗാഥ’ 96 തവണയും ‘അമരം’ 73 തവണയും ‘മൃഗയ’ 30 തവണയുമൊക്കെ കണ്ടു. ചില സിനിമകൾ മൂന്നു ഷോയും അടുപ്പിച്ചു കണ്ടിട്ടുണ്ട്​. ഒരു സിനിമയ്ക്ക് ഒരാഴ്ചത്തേക്ക് ബുക്ക്‌ ചെയ്യാൻ ചെന്നപ്പോൾ തിയേറ്റർ മാനേജർ സമ്മതിക്കാഞ്ഞതിനെ തുടർന്ന്​ സുബ്രൻ വഴക്കുണ്ടാക്കിയ സംഭവവും നാട്ടുകാർക്ക്​ പറയാനുണ്ട്​.

ചെന്നൈയിൽ പോയി നഗരത്തിൽ അലഞ്ഞുനടന്നു വീട് കണ്ടുപിടിച്ച്​ മമ്മൂട്ടിയെ കണ്ടിട്ടുണ്ട്​ സുബ്രൻ. കാവൽക്കാർ അകത്തുകയറ്റിവിടാഞ്ഞപ്പോൾ ബഹളം ​വച്ചതിനെ തുടർന്ന്​ മമ്മൂട്ടി നേരി​ട്ടെത്തുകയും സുബ്രനെ കാണുകയുമായിരുന്നു. കൊച്ചിയിലെയും ചെമ്പിലെയും മമ്മൂട്ടിയുടെ വീടുകളിൽ സ്​ഥിരം സന്ദർശകനുമായിരുന്നു. മമ്മൂട്ടി ചിത്രങ്ങളുടെ ലൊക്കേഷനിലും പതിവായി പോയിരുന്നു. മികച്ച അഭിനയത്തിന്​ രണ്ടുതവണ മമ്മൂട്ടിക്ക്​ സുബ്രൻ ഉപഹാരവും നൽകി.