കൊല്ലം: മദ്യലഹരിയിൽ സർജിക്കൽ ബ്ലേഡ് ഉപയോഗിച്ച് മകന്റെ കഴുത്തിൽ മുറിവേൽപ്പിച്ച അച്ഛനെ പൂയപ്പള്ളി പോലീസ് അറസ്റ്റ് ചെയ്തു. ഇളമാട്, ചെറുവക്കൽ മുടിയന്നൂർ പള്ളിക്ക് സമീപം ബിജുഭവനിൽ ബിജു(43)വാണ് പിടിയിലായത്.
വിദ്യാർത്ഥിയായ മകൻ ബിജിൻ കഴിഞ്ഞ ദിവസം മുറിയിലെ കസേരയിൽ ഇരിക്കുന്ന സമയത്ത് പുറകിലൂടെ എത്തി സർജിക്കൽ ബ്ലേഡ് ഉപയോഗിച്ച് കഴുത്തിൽ പരിക്കേൽപ്പിക്കുകയായിരുന്നു. ഒഴിഞ്ഞു മാറിയതിനാൽ മുറിവ് മാരകമായില്ല. പരിക്കേറ്റ കുട്ടിയെ അയൽവാസികൾ ആശുപത്രിയിൽ എത്തിച്ചു.
സ്ഥിരമായി മദ്യപിച്ചു വീട്ടിലെത്തുന്ന ബിജു അസഭ്യംപറഞ്ഞ് ബഹളമുണ്ടാക്കുകുന്നത് പതിവാണെന്നും കുട്ടികൾ ഓൺലൈൻ ക്ലാസിൽ പങ്കെടുക്കാൻ അനുവദിക്കാറില്ലെന്നും പൂയപ്പള്ളി പോലീസിൽ നൽകിയ പരാതിയിൽ പറയുന്നു. സംഭവത്തിനുശേഷം ഒളിവിൽപ്പോയ ബിജുവിനെ പിടികൂടി കോടതിയിൽ ഹാജരാക്കി റിമാൻഡ്‌ ചെയ്തു.
