കൊച്ചി: ലക്ഷദ്വീപ് സന്ദര്‍ശിക്കാന്‍ ഇടത് എംപിമാരുടെ സംഘത്തിനും അനുവാദമില്ല. രാഷ്ട്രീയ ലക്ഷ്യത്തോടെയുള്ള സന്ദര്‍ശനമാണെന്ന് ആരോപിച്ച് കലക്ടര്‍ എസ്. അസ്കര്‍ അലി അനുമതി നിഷേധിച്ചു.
എം.പിമാരായ എ.എം. ആരിഫ്, ഡോ. ശിവദാസന്‍, എളമരം കരീം, ബിനോയ് വിശ്വം, ജോണ്‍ ബ്രിട്ടാസ്, എം.വി. ശ്രേയാംസ്കുമാ‌ര്‍, കെ. സോമപ്രസാദ്, തോമസ് ചാഴികാടന്‍ എന്നിവരുടെ യാത്രയാണ് വിലക്കിയത്. സന്ദര്‍ശനം ജനങ്ങളുടെ കൂടിച്ചേരലുകള്‍ക്കും അതിലൂടെ കൊറോണ വ്യാപനത്തിനും വഴിവെക്കുമെന്നും ദ്വീപിലെ സമാധാനാന്തരീക്ഷം തകര്‍ക്കുമെന്നും ഉത്തരവില്‍ പറയുന്നു.
ദ്വീപ് നിവാസിയായ ഒരാളുടെ സ്പോണ്‍സര്‍ഷിപ് അടക്കം സന്ദര്‍ശനത്തിന് ആവശ്യമാണ്. ഇതടക്കം ലക്ഷദ്വീപ് സന്ദര്‍ശിക്കുന്നതിന് ആവശ്യമായ രേഖകള്‍ എം.പിമാര്‍ സമര്‍പ്പിച്ചിട്ടില്ലെന്നും ഭരണകൂടം പറയുന്നു. എന്നാൽ ജനപ്രതിനിധികള്‍ എന്ന നിലയില്‍ തങ്ങള്‍ക്ക് ഇത് ആവശ്യമില്ലെന്നാണ് എം.പിമാരുടെ നിലപാട്.
