ബെയ്​ജിങ്​: ചൈനയിലെ ആയോധനപരിശീലന കേന്ദ്രത്തിലുണ്ടായ തീപിടിത്തത്തിൽ 18 മരണം. പ്രദേശത്ത്​ താമസിക്കുന്ന കുട്ടികളാണ്​ മരിച്ചവരിൽ അധികവും.ഏഴിനും 16നും ഇടയിൽ പ്രായമുള്ള കുഞ്ഞുങ്ങളാണ്​ മരിച്ചവരിൽ അധികവും. 16 പേർക്ക്​ പരിക്കേറ്റതായും നാലുപേരുടെ നില അതീവ ഗുരുതരമാണെന്നും ​ഷേചെങ്​ കൗണ്ടി സർക്കാർ അറിയിച്ചു.

സംഭവത്തിൽ ​പരിശീലന കേന്ദ്രത്തിന്റെ ഉടമയെ പൊലീസ്​ കസ്​റ്റഡിയിലെടുത്തു. വ്യാഴാഴ്​ച രാവിലെ മൂന്നുമണിയോടെയായിരുന്നു അപകടം. രണ്ടാം നിലയിലാണ്​ ആയോധന കല പരിശീലന കേന്ദ്രം. അവിടെ തീ പടർന്നതോടെ കുട്ടികൾക്ക്​ രക്ഷപ്പെടാൻ പ്രയാസകരമായെന്നാണ്​ വിവരം. മരിച്ചവരെ തിരിച്ചറിഞ്ഞിട്ടില്ല.

ഷേചെങ്​ മാർഷ്യൽ ആർട്​സ്​ സെൻററിലാണ്​ തീപിടുത്തമുണ്ടായതെന്നാണ്​ വിവരം. തീപിടിത്തത്തി​ന്റെ കാരണം വ്യക്തമല്ല. കെട്ടിടങ്ങളിലെ നിർമാണ രീതിയെ തുടർന്ന്​ തീപിടിത്തം പതിവാണ്​ ചൈനയിൽ. 2000ത്തിൽ ക്രിസ്​മസ്​ ​തലേദിവസം ഹെനാനിലുണ്ടായ തീപിടിത്തത്തിൽ 309 പേർ കൊല്ലപ്പെട്ടിരുന്നു.