ജയ്പുർ: കർഷക നേതാവ് രാകേഷ് ടികായത് സഞ്ചരിച്ച വാഹനത്തിന് നേരെ വെടിവയ്പുണ്ടായതായി പരാതി. രാജസ്ഥാനിലെ അൽവാറിൽ വച്ചായിരുന്നു സംഭവം.ബിജെപിയാണ് ആക്രമണ ശ്രമത്തിന് പിന്നിലെന്ന് രാകേഷ് ടികായത് ആരോപിച്ചു. ആക്രമണത്തിൽ തകർന്ന കാറിൻറെ ദൃശ്യങ്ങളും അദ്ദേഹം ട്വിറ്ററിൽ നൽകുകയും ചെയ്തിട്ടുണ്ട്.
ബൻസൂറിൽ കർഷക മഹാപഞ്ചായത്തിൽ പങ്കെടുക്കാൻ പോകവെയാണ് അദ്ദേഹത്തിന്റെ വാഹനത്തിന് നേരെ ആക്രമണമുണ്ടായത്. ആക്രമണത്തിൽ കാറിന്റെ ചില്ലുകൾ തകർന്നിട്ടുണ്ട്. എന്നാൽ രാകേഷ് ടികായത് പരിക്കുകളൊന്നും ഏൽക്കാതെ രക്ഷപ്പെട്ടു.
സംഭവവുമായി നാലു പേരെ കസ്റ്റഡിയിൽ എടുത്തെന്ന് രാജസ്ഥാൻ പൊലീസ് അറിയിച്ചു. അതേസമയം, വെടിവെപ്പ് നടന്നതിന് തെളിവൊന്നും ലഭിച്ചിട്ടില്ലെന്നും കസ്റ്റഡിയിലുള്ളവരെ ചോദ്യം ചെയ്യുന്നത് തുടരുകയാണെന്നും പൊലീസ് അറിയിച്ചു.കുറ്റക്കാർക്കെതിരെ കർശനനടപടി സ്വീകരിക്കുമെന്ന് മുഖ്യമന്ത്രി അശോക് ഗെഹ്‌ലോട്ട് അറിയിച്ചു.
