കൊല്ലം: മത്സ്യബന്ധന മേഖലയെ ഇല്ലായ്മ ചെയ്യാനും കുത്തകകള്‍ക്ക് വില്‍ക്കാനുമുള്ള ശ്രമം നടക്കുന്നുവെന്ന പരാമര്‍ശത്തോടെ സംസ്ഥാന സര്‍ക്കാറിനെതിരെ രൂക്ഷ വിമര്‍ശനവുമായി കൊല്ലം ലത്തീന്‍ രൂപത. കേന്ദ്ര-സംസ്ഥാന സര്‍ക്കാറുകള്‍ക്കെതിരായ ഇടയലേഖനം ഇന്ന് രൂപതയിലെ ലത്തീന്‍ പള്ളികളില്‍ വായിച്ചു. കോര്‍പറേറ്റുകള്‍ക്കും സ്വകാര്യ കുത്തകകള്‍ക്കും മുന്‍ഗണന നല്‍കി നിലവിലെ മത്സ്യമേഖലയെ തകര്‍ക്കാനുള്ള നിയമനിർമാണം നടന്നെന്ന ആക്ഷേപം ഇതിലുണ്ട്.
ടൂറിസത്തിൻ്റെയും വികസനത്തിെൻ്റെയും പേരുപറഞ്ഞ് മത്സ്യത്തൊഴിലാളി മേഖലകളെ തകര്‍ത്തെറിയാനാണ് ശ്രമമെന്നും ഇത്തരം നയങ്ങള്‍ എതിര്‍ക്കേപ്പെടേണ്ടതാണെന്നും ഇടയലേഖനത്തിൽ പറയുന്നു. ഇതിലൂടെ മത്സ്യബന്ധന മേഖല ഇല്ലായ്മ ചെയ്യപ്പെടുകയാണ്.
മത്സ്യത്തൊഴിലാളികള്‍ക്ക് മാത്രമായി ഉണ്ടായിരുന്ന ഭവന നിർമാണ പദ്ധതി ലൈഫ് മിഷനില്‍ കൂട്ടിച്ചേര്‍ത്ത് സംസ്ഥാനം ആനുകൂല്യങ്ങള്‍ ഇല്ലാതാക്കി. ബ്ലൂ എക്കോണമി എന്ന പേരില്‍ കടലില്‍ ധാതുവിഭവങ്ങള്‍ കണ്ടെത്തുന്നതിനുള്ള ഖനനാനുമതി കേന്ദ്രം നല്‍കി എന്നും ലേഖനത്തിലുണ്ട്. മത്സ്യത്തൊഴിലാളികളെ തകര്‍ക്കാന്‍ ശ്രമിക്കുന്നവരെ തിരിച്ചറിയുകയും പ്രതിരോധിക്കുകയും ചെയ്യുമെന്നും നിലനില്‍പ്പിന്‍റെ പ്രശ്‌നമാണെന്നും പറയുന്നു.
