ഇൻഡോർ: വനിതാ സീനിയർ ഏകദിന ടൂർണമെന്‍റിൽ കരുത്തരായ മുംബൈയെ കേരളത്തി​ന്‍റെ ടി ഷാനിയും സംഘവും തകർത്തത് 47 റൺസിന്​. വൻതോക്കുകളെ എങ്ങനെ വീഴ്​ത്തണമെന്ന്​ പുരുഷകേസരികൾ കാട്ടിയ വഴിയേ ബാറ്റുവീശിയാണ് ഇവർ തകർപ്പൻ പ്രകടനം കാഴ്ചവച്ചത്.

ആദ്യം ബാറ്റുചെയ്​ത കേരളം സെഞ്ച്വറി നേടിയ ജിൻസി ജോർജിന്‍റെയും (107 നോട്ടൗട്ട്​) മിന്നുമണിയുടെയും (56) മിടുക്കിൽ നിശ്ചിത 50 ഓവറിൽ അഞ്ചു വിക്കറ്റിന്​ 233 റൺസെടുത്തപ്പോൾ മുംബൈക്ക്​ ഒമ്പതു വിക്കറ്റ്​ നഷ്​ടത്തിൽ 186 റൺസെടുക്കാനേ കഴിഞ്ഞുള്ളൂ.

ഇൻഡോർ എസ്​എസ്​ ക്രിക്കറ്റ്​ ഗ്രൗണ്ടിൽ നടന്ന മത്സരത്തിൽ ടോസ്​ നേടിയ മുംബൈ കേരളത്തെ ബാറ്റിങ്ങിനയക്കുകയായിരുന്നു. ഒമ്പതു റൺസെടുത്ത ഭൂമികയും 21 റൺസുമായി ക്യാപ്​റ്റൻ ഷാനിയും പുറത്തായപ്പോൾ കേരളം രണ്ടിന്​ 51. 11 റൺസുമായി അക്ഷയയും തിരിച്ചുകയറിയതോടെ 15ാം ഓവറിൽ മൂന്നുവിക്കറ്റിന്​ 66 റൺസെന്ന നിലയിലായിരുന്നു കേരളം.

ഈ ഘട്ടത്തിൽ ഒത്തുചേർന്ന ജിൻസിയും മിന്നുമണിയും സെഞ്ച്വറി കൂട്ടുകെട്ടുമായി ടീമിനെ മുന്നോട്ടു നയിക്കുകയായിരുന്നു. 77പന്തിൽ എട്ടു ഫോറടക്കം 56ലെത്തിയ മിന്നുമണി പുറത്താകു​മ്പോൾ കേരളം 186 റൺസിലെത്തിയിരുന്നു. ഐവി ദൃശ്യ 12 റൺസെടുത്ത്​ പുറത്തായശേഷം എസ്​ സജന ഏഴു റൺസുമായി ജിൻസിക്ക്​ കൂട്ടുനിന്നു. 143 പന്തിൽ 13 ഫോറുകളടങ്ങുന്നതാണ്​ ജിൻസിയുടെ ഇന്നിങ്​സ്​.

മറുപടി ബാറ്റിങ്ങിൽ മുംബൈക്കുവേണ്ടി വൃശാലി ഭഗത്​ ​ (52) മാത്ര​മേ തിളങ്ങിയുള്ളൂ. മിന്നുമണിയും അക്ഷയയും രണ്ടു വിക്കറ്റ്​ വീതം നേടിയ​പ്പോൾ സജന, മൃദുല, ജിപ്​സ വി. ജോസഫ്​, ഭൂമിക എന്നിവർ ഓരോ വിക്കറ്റ്​ വീഴ്​ത്തി. ജയത്തോടെ കേരളത്തിന്​ നാലു പോയന്‍റ്​ സ്വന്തമായി. പുരുഷ വിഭാഗം ട്വന്‍റി20 ടൂർണമെന്‍റിൽ മുഹമ്മദ്​ അസ്​ഹറുദ്ദീന്‍റെ സെഞ്ച്വറിയുടെ മികവിൽ ഈ സീസണിൽ കേരളം മുംബൈക്കെതിരെ തകർപ്പൻ ജയം നേടിയിരുന്നു.