ലണ്ടന്‍: രണ്ടാം ലോകയുദ്ധ കാലത്ത് യു.എസ് പ്രസിഡന്‍റ് ഫ്രാങ്ക്ളിന്‍ റൂസ്വെല്‍റ്റിന് അന്നത്തെ ബ്രിട്ടീഷ് പ്രധാനമന്ത്രി വിന്‍സ്റ്റണ്‍ ചര്‍ച്ചില്‍ സ്വന്തമായി വരച്ച്‌ കൈമാറിയ അപൂര്‍വ പെയിന്‍റിങ് ലേലത്തില്‍ വിറ്റുപോയത് റെക്കോഡ് തുകക്ക്. മൊറോക്കോയിലെ മറാകിഷ് നഗരത്തില്‍ അസ്തമയ ചാരുതയിലെ മസ്ജിദ് കാഴ്ചയാണ് ചര്‍ച്ചില്‍ പെയിന്‍റിങ്ങിന്‍റെ പ്രമേയം.
യു.എസ് നടി അഞ്ജലീന ജോളിയുടെ ശേഖരത്തിലുണ്ടായിരുന്ന ‘ഖുതുബിയ മോസ്ക് ടവര്‍’ എന്ന ചിത്രമാണ് മാര്‍ച്ച്‌ ഒന്നിന് ജോളി കുടുംബം വില്‍പന നടത്തിയത്. 2011ല്‍ നടന്‍ ബ്രാഡ് പിറ്റാണ് ജോളിക്കായി ചിത്രം വാങ്ങി സമ്മാനിച്ചിരുന്നത്. 2016ല്‍ ഇരുവരും പിരിഞ്ഞെങ്കിലും ചിത്രം ജോളി തന്നെ കൈവശം വെച്ചു. രണ്ടാം ലോക യുദ്ധകാലത്ത് ചര്‍ച്ചില്‍ വരച്ച ഏക ചിത്രം കൂടിയാണ് ‘ഖുതുബിയ മോസ്ക് ടവര്‍’ എന്ന സവിശേഷതയുമുണ്ട്.
1935ലാണ് ചര്‍ച്ചില്‍ ആദ്യമായി മൊറോക്കോയിലെത്തുന്നത്. ആ രാജ്യത്തെ പകര്‍ത്തിയ ചിത്രങ്ങളുമായി ഓര്‍മകള്‍ നിലനിര്‍ത്തിയ ബ്രിട്ടീഷ് പ്രധാനമന്ത്രി അവയോട് തന്‍റെ വ്യക്തിഗത ഇഷ്ടം പ്രത്യേകം കാണിക്കുകയും ചെയ്തു. അവയിലൊന്നാണ് അമേരിക്കന്‍ പ്രസിഡന്‍റിന് കൈമാറിയിരുന്നത്.ചെറുപ്പകാലം മുതല്‍ പെയിന്‍റിങ് രംഗത്ത് സജീവമായിരുന്ന ചര്‍ച്ചില്‍ 500ലേറെ ചിത്രങ്ങള്‍ വരച്ചിട്ടുണ്ട്.
മോറോക്കോയില്‍ 1943ല്‍ നടന്ന കസബ്ലാങ്ക കോണ്‍ഫറന്‍സിനാണ് ചര്‍ച്ചിലും റൂസ്വെല്‍റ്റും ഒന്നിച്ച്‌ മൊറോക്കോയിലെത്തിയിരുന്നത്. അതുകഴിഞ്ഞ് അറ്റ്ലസ് മലനിരകള്‍ക്കു പിറകില്‍ അസ്തമയ കാഴ്ചകള്‍ കണ്ടാണ് ഇരുവരും മടങ്ങിയത്.
