ന്യൂഡെല്‍ഹി: ആം ആദ്മി പാര്‍ട്ടി എംഎല്‍എ സോംനാഥ് ഭാരതിക്ക് രണ്ടു വര്‍ഷത്തെ തടവ് ശിക്ഷ. ഡെല്‍ഹി ജില്ലാ കോടതിയാണ് ശിക്ഷ വിധിച്ചത്. 2016ല് ഡല്‍ഹി എയിംസിലെ സുരക്ഷാ ജീവനക്കാരനെ ആക്രമിച്ച കേസിലാണ് കോടതി വിധി.
കേസില്‍ അപ്പീല്‍ നല്‍കാന്‍ എംഎല്‍എയ്ക്ക് കോടതി ജാമ്യം അനുവദിച്ചു. കേസിലെ മറ്റ് പ്രതികളായ നാല് പേരെ കോടതി വെറുതെ വിട്ടു. കോടതി ഉത്തരവിനെതിരെ സോംനാഥ് ഭാരതി ഡെല്‍ഹി ഹൈക്കോടതിയെ സമീപിക്കും.തടവ് ശിക്ഷക്ക് പുറമേ അഡീഷണല്‍ ചീഫ് മെട്രോപൊളിറ്റിന്‍ മജിസ്ട്രേറ്റ് രവീന്ദ്ര കുമാര്‍ പാണ്ഡ്യ ഒരു ലക്ഷം പിഴയും വിധിച്ചിട്ടുണ്ട്.
പ്രോസിക്യൂഷന് കേസ് പ്രകാരം സോംനാഥ് ഭാരതിയും മറ്റ് 300 പേര് ചേര്‍ന്ന് എയിംസിന്‍റെ വേലി തകര്‍ത്ത് അതിക്രമിച്ച്‌ കടക്കുകയായിരുന്നു. പിഴവുകളില്ലാതെ കേസ് തെളിയിക്കാന്‍ പ്രോസിക്യൂഷന് കഴിഞ്ഞുവെന്ന് കോടതി നിരീക്ഷിച്ചു.
ഐ.പി.സി സെക്ഷന്‍ 323, 353, 147 വകുപ്പുകള്‍ പ്രകാരമാണ് കോടതി സോംനാഥ് ഭാരതിയെ ശിക്ഷിച്ചത്. പൊതുമുതല്‍ നശിപ്പിക്കുന്നതിനെതിരായ വകുപ്പും അദ്ദേഹത്തിനെതിരെ ചുമത്തിയിട്ടുണ്ട്.