പനാജി: ഐഎസ്എല്ലിൽ ചെന്നൈയിനെതിരെ ഹൈദരാബാദ് എഫ്സിക്ക് വമ്പൻ ജയം. ചെന്നൈയിനെ ഒന്നിനെതിരെ നാലു ഗോളുകൾക്കാണ് ഹൈദരാബാദ് പരാജയപ്പെടുത്തിയത്‌. നർസാരിയുടെ ഇരട്ട ഗോളുകളാണ് ഹൈദരവബാദിന് വലിയ വിജയം നൽകിയത്. മത്സരത്തിന്‍റെ രണ്ടാം പകുതിയിലാണ് എല്ലാ ഗോളുകളും പിറന്നത്.
50-ാം മിനിറ്റിൽ ജോയൽ ജോസഫിന്‍റെ വക ആയിരുന്നു ഹൈദരബാദിന്‍റെ ആദ്യ ഗോൾ. ചെന്നൈയിൻ ഡിഫൻഡറും ഗോൾ കീപ്പറും തമ്മിൽ ഉണ്ടായ ധാരണ പിശകാണ് ഗോളിൽ കലാശിച്ചത്. പിന്നാലെ നർസാരിയിലൂടെ ഹൈദരാബാദ് രണ്ടാം ഗോളും നേടി.
ഈ ഗോളിന് 67-ാം മിനിറ്റിൽ താപയിലൂടെ ഒരു ഗോൾ മടക്കാൻ ചെന്നൈയിന് ആയി. പക്ഷെ ഇത് ഹൈദരാബാദിനെ കൂടുതൽ കരുത്തൻമാരാക്കി.74-ാം മിനിറ്റിൽ ജാവോ വിക്ടർ ഹൈദരാബാദിന്‍റെ മൂന്നാം ഗോളും നേടി. തൊട്ടുപിന്നാലെ നർസാരി തന്‍റെ രണ്ടാം ഗോളും കണ്ടെത്തി.
ഈ വിജയത്തോടെ ലീഗിൽ ആറാം സ്ഥാനത്തേക്ക് എത്താൻ ഹൈദരബാദിനായി. എട്ടാം സ്ഥാനത്താണ് ചെന്നൈയിൻ.
