മുണ്ടക്കയം: ദേശീയപാതയിൽ ടെംബോ ട്രാവലർ മറിഞ്ഞ് പിഞ്ചുകുഞ്ഞടക്കം 21പേർക്ക് പരിക്ക്. കൊട്ടാരക്കര-ദിണ്ഡുഗൽ ദേശീയപാതയിൽ മരുതുമൂട് പഴയ പൊലീസ് സ്റ്റേഷന് സമീപം ശനിയാഴ്ച രാത്രി എട്ടോടെയാണ് അപകടമുണ്ടായത്. കലൂർ അശോക റോഡിൽ താമസിക്കുന്ന ഷിബുവിൻെറ മകൾ ഏഴുമാസം പ്രായമുള്ള പെൺകുട്ടിക്ക് ഗുരുതരപരിക്കേറ്റിട്ടുണ്ട്.കുട്ടിയെ കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി.
വിനോദസഞ്ചാര കേന്ദ്രങ്ങളായ വാഗമൺ, പരുന്തുംപാറ, പാഞ്ചാലിമേട് എന്നിവിടങ്ങൾ സന്ദർശിച്ച്മടങ്ങുകയായിരുന്ന എറണാകുളം കലൂർ സ്വദേശികളായ ബന്ധുക്കളാണ് അപകടത്തിൽപെട്ടത്. മുണ്ടക്കയം ഭാഗത്തേക്ക് ഇറക്കമിറങ്ങുന്നതിനിടെ നിയന്ത്രണംവിട്ട് റോഡരികിലെ ക്രാഷ് ബാരിക്കേഡ് തകർത്ത് സമീപത്തെ റബർ തോട്ടത്തിലേക്ക് മറിയുകയായിരുന്നു. രാവിലെയാണ് ഇവർ വാഗമണിലേക്ക് പോയത്.
കുട്ടികൾ അടക്കം 21പേർ വാഹനത്തിലുണ്ടായിരുന്നു. 20പേർക്ക് മുപ്പത്തിയഞ്ചാംമൈൽ മെഡിക്കൽ ട്രസ്റ്റ് ആശുപത്രിയിൽ പ്രാഥമിക ചികിത്സ നൽകി. ഇവരിൽ മൂന്നുപേരെ എറണാകുളത്തെ ആശുപത്രിയിലേക്ക് കൊണ്ടുപോയി. പൊലീസും നാട്ടുകാരും ചേർന്ന് രക്ഷാപ്രവർത്തനം നടത്തി.
