കോഴിക്കോട്​​: മുക്കുപണ്ടം പണയം വെച്ച്‌​ പണം തട്ടിയ കേസിൽ ബാങ്ക് ജീവനക്കാർക്കും പങ്കുണ്ടെന്ന് പൊലീസ്​. 45 തവണയായി 5.600 കിലോ ഗ്രാം മുക്കുപണ്ടമാണ്​ തട്ടിപ്പിന്​ നേതൃത്വം കൊടുത്ത ബിസിനസ്​ സംരംഭക വയനാട്​ ഇരുളം മണവയല്‍ അങ്ങാടിശ്ശേരി പുതിയേടത്ത്​ വീട്ടില്‍ കെ.കെ. ബിന്ദു (43)​ പണയം വെച്ചത്​.

ബാങ്ക്​ ​കെട്ടിടത്തിനു​ താഴെയും കോര്‍ട്ട്​ റോഡിലുമായി റെഡിമെയ്​ഡ്​ കട, മെസ്​ ഹൗസ്​, ബ്യൂട്ടിപാര്‍ലര്‍, ടെയ്​ലറിങ്​ യൂനിറ്റ്​​ തുടങ്ങിയ സ്​ഥാപനങ്ങള്‍ നടത്തുകയാണ്​ ബിന്ദു. ബാങ്ക്​ ജീവനക്കാരുമായുള്ള സൗഹൃദം മുതലെടുത്താണ്​ ഇവര്‍ വ്യാജസ്വര്‍ണം നല്‍കി 1.69 കോടി രൂപ വായ്പയെടുത്തത്.

10​ ശതമാനം വരെ സ്വർണത്തിന്റെ അംശമുള്ള ആഭരണങ്ങളാണ്​ തട്ടിപ്പിന്​ ഉപയോഗിച്ചത്​. വളകളും മാലകളുമായിരുന്നു ഇതില്‍ ഏറെയും. തൃശൂരില്‍നിന്നാണ്​ ഈ വ്യാജസ്വര്‍ണം എത്തിച്ചതെന്ന്​ പ്രതി മൊഴി നല്‍കി​. പി.എം താജ്​ റോഡിലെ യൂണിയന്‍ ബാങ്ക്​ ശാഖയില്‍ 2020 ​ഫെബ്രുവരി മുതല്‍ നവംബര്‍ 24 വരെയാണ്​ തട്ടിപ്പ്​ നടന്നത്​.

മൊത്തം 1,69,51,385 രൂപ കൈപ്പറ്റി​. 20 തവണ ബിന്ദു തന്നെയാണ്​ പണയം വെച്ചത്. ബാക്കിയുള്ളത്​ തന്റെ സ്​ഥാപനത്തിലെ ജീവനക്കാരുടെ അക്കൗണ്ട്​ വഴിയായിരുന്നു​വെന്നാണ് അന്വേഷണത്തില്‍ കണ്ടെത്തിയത്​. ​ബാങ്കിന്റെ ഓഡിറ്റിങ് വിഭാഗം നടത്തിയ പരിശോധനയിലാണ്​ തട്ടിപ്പ്​ ശ്രദ്ധയില്‍പെട്ടത്​. തുടര്‍ന്ന്​ നല്‍കിയ പരാതിയില്‍ ടൗണ്‍ പൊലീസ്​ അന്വേഷണം നടത്തി പ്രതിയെ പിടികൂടുകയായിരുന്നു.

പണയംവെക്കുന്ന സ്വര്‍ണം പരിശോധിക്കുന്ന അപ്രൈസര്‍ക്കും തട്ടിപ്പില്‍ ബന്ധമുള്ളതായി സംശയമുണ്ട്​. ബാങ്ക്​ മാ​നേജറെയും ​കടയിലെ ജീവനക്കാരെയും പൊലീസ് ചോദ്യംചെയ്യും. നഗരത്തിലെ ഫ്ലാറ്റിലാണ്​ ബിന്ദു താമസിച്ചിരുന്നത്​. ഇവിടെ നിന്നും ബിന്ദുവിന്റെ കടകളില്‍നിന്നും വ്യാജസ്വര്‍ണം പിടിച്ചെടുത്തിട്ടുണ്ട്.

നേരത്തേ, ചിട്ടി തട്ടിപ്പ്​ കേസില്‍ പ്രതിയായിരുന്ന ബിന്ദു ജാമ്യത്തിലിറങ്ങിയതാണ്​. അറസ്​റ്റ്​ ചെയ്​ത പ്രതിയെ കോടതി റിമാന്‍ഡ്​ ചെയ്​തു. വിവിധയിടങ്ങളിലെ തെളിവെടുപ്പിനായി കസ്​റ്റഡിയില്‍ വാങ്ങാൻ അപേക്ഷ നല്‍കുമെന്ന്​ അന്വേഷണ ഉദ്യോഗസ്​ഥന്‍ അറിയിച്ചു.