കൊച്ചി: യുണൈറ്റഡ് നഴ്സസ് അസോസിയേഷനിലെ (യുഎൻഎ) സാമ്പത്തിക തട്ടിപ്പുമായി ബന്ധപ്പെട്ട് സംഘടനയുടെ അഞ്ച് ബാങ്ക് അക്കൗണ്ടുകള്‍ മരവിപ്പിച്ചതിനെതിരെ സംസ്ഥാന സെക്രട്ടറി പി.രശ്മി നല്‍കിയ ഹര്‍ജി ഹൈക്കോടതി ഡിസംബര്‍ രണ്ടിനു പരിഗണിക്കാന്‍ മാറ്റി. തൃശൂരിലെ ഈ അക്കൗണ്ടുകള്‍ മരവിപ്പിച്ചതുമൂലം ജീവനക്കാര്‍ക്ക് ശമ്പളം നല്‍കാനോ വായ്പ തിരിച്ചടയ്ക്കാനോ സാധിക്കുന്നില്ലെന്ന് ചൂണ്ടിക്കാട്ടിയാണ് ഹൈക്കോടതിയെ സമീപിച്ചത്.
മുഴുവന്‍ അക്കൗണ്ടുകളും മരവിപ്പിക്കേണ്ടതുണ്ടോയെന്ന് സിംഗിള്‍ബെഞ്ച് വാക്കാല്‍ ചോദിച്ചു. 65.99 ലക്ഷം രൂപയുടെ ക്രമക്കേട് അഞ്ച് ബാങ്ക് അക്കൗണ്ടുകളിലായി നടന്ന കേസിലാണ് അവ മരവിപ്പിച്ചതെന്ന് ബോധിപ്പിച്ച സര്‍ക്കാര്‍, ഹര്‍ജിയെ എതിര്‍ത്തു. സര്‍ക്കാരിന്റെ എതിര്‍പ്പ് രേഖാമൂലം അറിയിക്കാനാണ് ഹര്‍ജി മാറ്റിയത്.