കൊച്ചി: സർക്കാർ അധികാരത്തിൽ വന്നപ്പോൾ സംസ്ഥാനത്തെ എല്ലാ സർവകലാശാലാ രജിസ്ട്രാർമാരെയും മാറ്റിയിട്ടും വിരമിക്കൽ പ്രായം കഴിഞ്ഞ കേരള ഫിഷറീസ്, സമുദ്രപഠന സർവകലാശാല (കുഫോസ്) മുൻ രജിസ്ട്രാറെ തുടരാൻ മൗനാനുവാദം നൽകിയ സർക്കാരും സർവ്വകലാശാലയും ഒടുവിൽ വെട്ടിലായി. ചട്ടം ലംഘിച്ച് രണ്ട് വർഷം കൂടുതൽ പദവിയിൽ തുടർന്ന രജിസ്ട്രാറുടെ വിവരം വിവാദമായപ്പോൾ ഒടുവിൽ സർക്കാർ നടപടിയും. 45 ലക്ഷത്തിലധികം രൂപയുടെ ആനുകൂല്യം കൈപ്പറ്റിയ കേരള ഫിഷറീസ്, സമുദ്രപഠന സർവകലാശാല (കുഫോസ്) മുൻ രജിസ്ട്രാർക്കെതിരെയാണ് ഇപ്പോൾ സർക്കാർ നടപടിക്ക് നിർദേശം നൽകിയത്.
ഓഡിറ്റ് വിഭാഗത്തിൻ്റെ റിപ്പോർട്ടിൻ്റെ അടിസ്ഥാനത്തിലാണ് മുൻ രജിസ്ട്രാർ വിക്ടർ ജോർജ് അനധികൃതമായി കൈപ്പറ്റിയ തുക തിരിച്ചുപിടിക്കാൻ സർവകലാശാല അധികൃതർക്ക് നിർദേശം നൽകിയത്. 2014 ഫെബ്രുവരി 19നാണ് ഡോ. വിക്ടർ ജോർജ് ഡെപ്യൂട്ടേഷനിൽ കുഫോസ് രജിസ്ട്രാറായി എത്തിയത്.
പദവിയിൽ അഞ്ച് വർഷം അല്ലെങ്കിൽ 56 വയസ്സ് ഏതാണോ ആദ്യം അപ്പോൾ വിരമിക്കണമെന്നാണ് സർവകലാശാല ചട്ടം. ഇതനുസരിച്ച് ഇദ്ദേഹം 2017 ഏപ്രിൽ 19ന് വിരമിക്കണം. എന്നാൽ പദവിയിലെത്തുന്ന സമയത്ത് വിരമിക്കൽ പ്രായം 60 ആയിരുന്നുവെന്നാണ് മുൻ രജിസ്ട്രാർ ഇക്കാര്യത്തിലുള്ള അവകാശവാദം.
ഇക്കാര്യം ചൂണ്ടിക്കാട്ടി സർവകലാശാല ഗവേണിങ് കൗൺസലിനെക്കൊണ്ട് വിരമിക്കൽ പ്രായം 60 ആക്കി ഉയർത്തി തീരുമാനമെടുപ്പിക്കുകയും എല്ലാ ആനുകൂല്യങ്ങളും കൈപ്പറ്റി 2019 ഏപ്രിൽ 19 വരെ സർവിസിൽ തുടരുകയും ചെയ്തു എന്നാണ് ഓഡിറ്റ് വിഭാഗം കണ്ടെത്തിയത്. എന്നാൽ ഇക്കാര്യത്തിൽ സർക്കാരിന് നേരത്തേ വേണമെങ്കിൽ നടപടിയെടുക്കമായിരുന്നിട്ടും വേണ്ട ഒത്താശ ചെയ്തെന്ന് ആക്ഷേപമുണ്ട്.
വിരമിക്കൽ പ്രായം ഉയർത്തിയ ഗവേണിങ് കൗൺസിൽ തീരുമാനം ഗവർണറും സർക്കാറും തള്ളിയിട്ടും രജിസ്ട്രാർ പദവിയിൽ തുടർന്നു. ശമ്പളവും ലീവ് സറണ്ടർ ആനുകൂല്യം ഉൾപ്പെടെ കൈപ്പറ്റിയ 45.5 ലക്ഷത്തിൽനിന്ന് 40 ലക്ഷം വിക്ടർ ജോർജിൽനിന്നും അഞ്ചര ലക്ഷം അനധികൃതമായി പദവിയിൽ തുടരാൻ അവസരമൊരുക്കിയ ഗവേണിങ് കൗൺസിൽ അംഗങ്ങളിൽ നിന്നും തിരിച്ചുപിടിക്കണമെന്നാണ് ഓഡിറ്റ് വിഭാഗം സർക്കാറിന് നൽകിയ റിപ്പോർട്ടിലെ ശിപാർശ.
തുക തിരിച്ചുപിടിക്കാൻ സർക്കാറിൻ്റെ രേഖാമൂലമുള്ള നിർദേശം ലഭിച്ചതായും അടുത്ത ഗവേണിങ് കൗൺസിൽ യോഗം വിഷയം ചർച്ച ചെയ്ത് തീരുമാനമെടുക്കുമെന്നും കുഫോസ് രജിസ്ട്രാർ ഡോ. ബി. മനോജ്കുമാർ എന്നാൽ, സർവകലാശാല ഉത്തരവ് പ്രകാരമാണ് പ്രവർത്തിച്ചതെന്നും ചട്ടലംഘനമുണ്ടായിട്ടില്ലെന്നുമാണ് വിക്ടർ ജോർജിൻ്റെ വിശദീകരണം.
