ഗ്വാളി​യാർ: പൊലീസ്​ ഉദ്യോഗസ്​ഥൻ അപ്രതീക്ഷിതമായി സഹപ്രവർത്തകർക്ക്​ മുമ്പിൽ. വേഷം ഭിക്ഷക്കാര​ൻ്റെയും. എന്താണ്​ സംഭവിക്കുന്നതെന്ന്​ മനസിലാകാതെ ആദ്യം ഞെട്ടിയെങ്കിലും പിന്നീട്​ അത്​ഭുതവും സന്തോഷവുമായിരുന്നു സുഹൃത്തുക്കൾ കൂടിയായ സഹപ്രവർത്തകർക്ക്. 15 വർഷം മുമ്പ്​ കാണാതായ സഹപ്രവർത്തകനെ തിരിച്ചറിഞ്ഞ അവർ ഞെട്ടി.

ചൊവ്വാഴ്​ച രാത്രി നഗരത്തിലെ വിവാഹഹാളിൽ പോകാനിറങ്ങിയതായിരുന്നു ഡെപ്യൂട്ടി പൊലീസ്​ സൂപ്രണ്ടുമാരായ രത്​നേഷ്​ സിങ്​ തോമറും വിജയ്​ സിങ്​ ബഹദൂറും. വഴിമധ്യേ ഒരു ഭിക്ഷക്കാരനെ കണ്ടു. തണുത്തുവിറച്ചിരുന്ന അയാൾ വഴിയിൽ നിന്ന്​ ഭക്ഷണ അവശിഷ്​ടങ്ങൾ തിരയുകയായിരുന്നു. ഇതുകണ്ട്​ ദയനീയത തോന്നിയ പൊലീസുകാർ ധരിക്കാനായി ജാക്കറ്റ്​ നൽകി. ജാക്കറ്റ്​ നൽകി​യതോടെ പൊലീസുകാരുടെ പേരുകൾ വിളിക്കുകയായിരുന്നു.

ഭിക്ഷക്കാരൻ തങ്ങളുടെ പേര്​ വിളിച്ചതോടെ ആദ്യം ഞെട്ടിയെങ്കിലും പിന്നീട് സത്യം തിരിച്ചറിഞ്ഞു. 2005ൽ കാണാതായ തങ്ങളുടെ സഹപ്രവർത്തകൻ മനീഷ്​ മിശ്രയാണെന്ന്​ ഇരുവരും മനസിലാക്കുകയായിരുന്നു. ഇദ്ദേഹത്തിന്​ മാനസിക ബുദ്ധിമുട്ട്​ നേരിടുന്നതായും പൊലീസുകാർ പറഞ്ഞു.

ദാട്ടിയ സ്​റ്റേഷനിലെ ഇൻസ്​പെക്​ടറായിരുന്നു മനീഷ്​ മിശ്ര. 15 വർഷമായി മനീഷ്​ മിശ്ര എവിടെ യാണെന്നത്​ സംബന്ധിച്ച്​ യാതൊരു വിവരങ്ങളും ലഭ്യമായിരുന്നില്ല. മാനസിക ബുദ്ധിമുട്ട്​ നേരിടുന്നതിനാൽ മനീഷ്​ മിശ്രയെ പൊലീസുകാർ തന്നെ എൻജിഒയിലാക്കി.

1999ലാണ്​ മനീഷ്​ മിശ്ര പൊലീസിൽ ചേരുന്നത്​. മികച്ച ഷൂട്ടർ കൂടിയായിരുന്നു ഇദ്ദേഹം. കുറച്ചുവർഷങ്ങൾക്കുശേഷം ഇദ്ദേഹത്തിന്​ മാനസിക ബുദ്ധിമുട്ടുകൾ​ നേരിട്ടിരുന്നു. കുടുംബം ഇദ്ദേഹത്തിന്​ ആവശ്യമായ ചികിത്സ നൽകുകയും ചെയ്​തു. എന്നാൽ ഒരുദിവസം മനീഷ്​ മിശ്രയെ കാണാതാകുകയായിരുന്നു. സഹപ്രവർത്തകരും സുഹൃത്തുക്കളും ചേർന്ന്​ അദ്ദേഹത്തിന്​ ആവശ്യമായ ചികിത്സ ഉറപ്പാക്കുമെന്നും സാധാരണ നിലയിലേക്ക്​ കൊണ്ടുവരുമെന്നും തോമർ പറഞ്ഞു.