ന്യൂഡെൽഹി: പുകമഞ്ഞിൽ മൂടിയ തലസ്​ഥാനത്ത്​ വായു മലിനീകരണം​ വൻ തോതിൽ ഉയരുന്നു. ഇന്ദിര ഗാന്ധി അന്താരാഷ്​ട്ര വിമാനത്താവളത്തിന്​ സമീപവും ആർകെ പുരത്തും വായു നിലവാര സൂചിക (എക്യുഐ) യഥാക്രമം 328, 354 ആണ്​ രേഖപ്പെടുത്തിയത്. ഡൽഹി മലിനീകരണ നിയന്ത്രണ കമ്മിറ്റി (ഡിപിസിസി) യാണ് വിവരങ്ങൾ പുറത്തുവിട്ടത്.

വായു നിലവാര സൂചിക അനുസരിച്ച്‌ പൂജ്യം മുതൽ 50 വരെ നല്ലതും 51-100 വരെ തൃപ്തികരവും 101-200 വരെ മിതമായതും 201-300 വരെ മോശവും 301-400 വരെ വളരെ മോശവും 401-500 വരെ അപകടകരവുമായാണ്​ കണക്കാക്കുന്നത്.

ദീപാവലിയോടനുബന്ധിച്ച്‌​ പടക്കംപൊട്ടിക്കുന്നതും മാലിന്യം കത്തിക്കുന്നതും പുകമലിനീകരണത്തിന്​ കാരണമാകുന്നതായി വായു ഗുണനിലവാര കാലാവസ്ഥ പ്രവചന ഗവേഷണ കേന്ദ്രം (എസ്എഎഫ്എആർ -സഫർ) റിപ്പോർട്ടിൽ പറഞ്ഞു. ഹരിയാന, പഞ്ചാബ് തുടങ്ങിയ സംസ്ഥാനങ്ങളിലെ കൊയ്ത്തുകഴിഞ്ഞ പാടങ്ങളിൽ വൈക്കോൽ ഉൾപ്പെടെയുള്ള അവശിഷ്ടങ്ങൾ കത്തിക്കുന്നത്​ നഗരത്തെ ഗുരുതമായി ബാധിക്കുന്നുണ്ട്​. ശൈത്യകാലമായതിനാൽ ഈ പുക അന്തരീക്ഷത്തിൽ തങ്ങിനിന്ന്​ മഞ്ഞുമായി കൂടിക്കലരുന്നതാണ്​ മലിനീകരണം രൂക്ഷമാക്കുന്നത്​. ഇത്​ മുൻകൂട്ടിക്കണ്ട്​ പടക്കം പൊട്ടിക്കുന്നതിനും വൈക്കോൽ കത്തിക്കുന്നതിനും ഡൽഹി സർക്കാർ കടുത്ത നിയന്ത്രണം ഏർപ്പെടുത്തിയിട്ടുണ്ട്​.

വൈക്കോൽ കത്തിക്കുന്നതിന്​ കനത്ത പിഴശിക്ഷയാണ്​ പുതിയ നിയമപ്രകാരം ഏർപ്പെടുത്തിയത്​. അഞ്ച്​ വർഷം വരെ തടവും ഒരു കോടി വരെ പിഴയും ശിക്ഷയായി ലഭിക്കും.