തിരുവനന്തപുരം: തദ്ദേശ തെരഞ്ഞെടുപ്പിൽ വലിയ നേട്ടമുണ്ടാക്കുമെന്ന പ്രഖ്യാപനവുമായി പ്രതിപക്ഷ പാർട്ടികൾ.
തെരഞ്ഞെടുപ്പ് പ്രഖ്യാപനത്തിന് പിന്നാലെയാണ് ബിജെപി സംസ്ഥാന അധ്യക്ഷൻ കെ.സുരേന്ദ്രനും യുഡിഎഫ് തൂത്തുവാരുമെന്ന് പ്രതിപക്ഷ നേതാവ് രമേശ് ചെന്നിത്തലയും രംഗത്തെത്തിയത്.
എൽഡിഎഫും യുഡിഎഫും ഒരുപോലെയാണെന്ന ബിജെപിയുടെ പ്രചരണം ജനങ്ങൾക്ക് ബോധ്യമായിട്ടുണ്ട്. വലിയ തയാറെടുപ്പുകളാണ് എൻഡിഎ തദ്ദേശ തെരഞ്ഞെടുപ്പ് മുന്നിൽ കണ്ട് ഒരുക്കുന്നത്. സ്ഥാനാർഥി നിർണയവും സീറ്റ് വിഭജനവും വളരെ വേഗം പൂർത്തിയാക്കും. താഴെതലം മുതൽ ബിജെപി ശക്തമായ പ്രചരണം നടത്തുമെന്നും കെ.സുരേന്ദ്രൻ വ്യക്തമാക്കി.
അതേസമയം, എൽഡിഎഫ് സമ്പൂർണ്ണ തകർച്ചയിലാണെന്നും അഴിമതിയിൽ മുങ്ങിക്കുളിച്ചിരിക്കുന്ന സർക്കാരാണ് കേരളത്തിലേത് എന്നും ചെന്നിത്തല പറഞ്ഞു. തെരഞ്ഞെടുപ്പ് വിജയത്തിനും അഴിമതിക്കും എൽഡിഎഫ് ആരോടും കൂട്ടുചേരുമെന്നും ചെന്നിത്തല പരിഹസിച്ചു.
