ന്യൂഡെൽഹി: ലഹരിമരുന്ന്​ ഇടപാടുമായി ബന്ധപ്പെട്ട് ചോദ്യം ചെയ്യാൻ ബോളിവുഡ്​ നടി ദീപിക പദുക്കോണി​ൻ്റെ മാനേജർ കരിഷ്​മ പ്രകാശിനെ ഇനിയും കണ്ടെത്താനായില്ലെന്ന്​ നാർക്കോട്ടിക്​സ്​ കൺട്രോൾ ബ്യൂറോ. ബുധനാഴ്​ച ഹാജരാവാൻ ആവശ്യപ്പെട്ട്​ എൻസിബി കരിഷ്​മക്ക്​ നോട്ടീസ്​ നൽകിയിരുന്നുവെങ്കിലും അവർ അതിനോട്​ പ്രതികരിച്ചിട്ടില്ല.

കരിഷ്​മയെ കണ്ടെത്താൻ കഴിയാത്ത സാഹചര്യത്തിൽ അവരുടെ അമ്മയ്ക്കും അവർ പ്രവർത്തിച്ചിരുന്ന ക്വാൻ ടാലൻറ്​ ഏജൻസിയി​ലെ ജോലിക്കാർക്കും ചോദ്യം ചെയ്യലിന്​ ഹാജരാവാൻ ആവശ്യപ്പെട്ട്​ നോട്ടീസ്​ നൽകുമെന്നും എൻസിബി അറിയിച്ചു.

ബുധനാഴ്​ചയാണ്​ കരിഷ്​മ​യെ ചോദ്യം ചെയ്യലിന്​ വിളിപ്പിച്ചിരിക്കുന്നത്​. പക്ഷേ നോട്ടീസിനോട്​ അവർ ഇതുവരെ പ്രതികരിച്ചിട്ടില്ല. അവരുടെ പ്രതികരണത്തിനായി കാത്തിരിക്കുകയാണെന്ന്​​ എൻസിബി ​മുംബൈ സോണൽ ഡയറക്​ടർ സമീർ വാംഖഡെ പറഞ്ഞു.

​കരിഷ്​മയുടെ വീട്ടിൽ എൻസിബി റെയ്​ഡ്​ നടത്തിയിരുന്നു. റെയ്​ഡിൽ 1.7 ​ഗ്രാം ഹാഷിഷ്​ പിടിച്ചെത്തിരുന്നു. സെപ്​റ്റംബറിലും കരിഷ്​മയെ എൻസിബി സംഘം ചോദ്യം ചെയ്​തിരുന്നു. ബോളിവുഡിലെ ലഹരിമരുന്ന്​ ഇടപാടുകളിൽ കരിഷ്​മക്കും പങ്കുണ്ടെന്നാണ്​ എൻസിബി പറയുന്നത്​.