മുംബൈ: സമൂഹ മാധ്യമങ്ങളിലെ വ്യാജ അക്കൗണ്ടുകളെ ആഭ്യന്തര മന്ത്രി അമിത് ഷാ നിയന്ത്രിക്കണമെന്ന ആവശ്യവുമായി ശിവസേന വക്താവ് സഞ്ജയ് റാവത്ത്. ഇത്തരത്തിലുള്ള വ്യാജ അക്കൗണ്ടുകള്‍ സര്‍ക്കാറിന് തിരിച്ചടിയുണ്ടാക്കും. ശുദ്ധീകരണം അമിത് ഷാ സ്വന്തം പാര്‍ട്ടിയില്‍ നിന്ന് തുടങ്ങണമെന്നും റാവത്ത് ആവശ്യപ്പെട്ടു.
സേനാ മുഖപത്രമായ സാമ്നയിലെഴുതിയ ലേഖനത്തിലാണ് റാവത്തിൻ്റെ പരാമര്‍ശം. മുംബൈ പൊലീസിനെതിരെ വ്യാജ വാര്‍ത്തകള്‍ പ്രചരിപ്പിക്കാന്‍ ഏകദേശം 80,000ത്തോളം അക്കൗണ്ടുകള്‍ സൃഷ്ടിക്കപ്പെട്ടിട്ടുണ്ടെന്നും റാവത്ത് പറഞ്ഞു. സൈബര്‍ ആര്‍മിയെ ഉപയോഗിച്ച്‌ രാഷ്ട്രീയ ശത്രുക്കളെ നേരിടുന്നത് രാജ്യത്തിന് അവമതിപ്പുണ്ടാക്കുമെന്നും അദ്ദേഹം പറഞ്ഞു.