ലണ്ടൻ : റിലയൻസ് ഗ്രൂപ്പ് ചെയർമാൻ അനിൽ അംബാനിയുടെ ലോകമെമ്പാടുമുള്ള സ്വത്തുക്കൾ കണ്ടുകെട്ടുന്ന നടപടിക്ക് ഒരുങ്ങി ചൈനീസ് ബാങ്കുകൾ. മൂന്ന് ചൈനീസ് ബാങ്കുകളിൽനിന്നായി വായ്പ ഇനത്തിൽ 5300 ഓളം കോടി രൂപയാണ് അനിൽ അംബാനി തിരിച്ചടക്കാനുള്ളത് എന്നാണ് ചൈനീസ് ബാങ്കുകൾ അവകാശപ്പെടുന്നത്. എന്നാൽ ഇതിനെതിരെ അനിൽ അംബാനിയും പരാതി നൽകിയിട്ടുണ്ട്.
കഴിഞ്ഞ മെയ് 22നാണ് ഇംഗ്ലണ്ടിലെ കോടതി ചൈനാ ബാങ്കിന്റെ കേസ്സ് പരിഗണിച്ചത്. ഇന്‍ഡസ്ട്രീയല്‍ ആന്റ് കൊമേഴ്‌സ്യല്‍ ബാങ്ക് ഓഫ് ചൈന, എക്‌സപോര്‍ട്ട്- ഇംപോര്‍ട്ട് ബാങ്ക് ഓഫ് ചൈനാ, ചൈനാ ഡെവലപ്പ്‌മെന്റ് ബാങ്ക് എന്നിവര്‍ സംയുക്തമായാണ് കേസ്സ് നല്‍കിയിരിക്കുന്നത്.
2012ലാണ് മൂന്ന് ചൈനീസ് ബാങ്കുകൾ അനിൽ അംബാനിക്ക് വ്യക്തി ജാമ്യത്തിൽ വായ്പ അനുവദിച്ചത്. എന്നാൽ 2017 മുതൽ തുക തിരിച്ചടക്കുന്നതിൽ വീഴ്ച വരുത്തുകയായിരുന്നു.
മൂന്ന് ചൈനീസ് ബാങ്കുകളിൽ നിന്ന് വായ്പ യെടുത്ത് തിരിച്ചടക്കാത്തതിനെ തുടർന്ന് മേയ് 22ന് ലണ്ടൻ കോടതി അനിൽ അംബാനി 5276 കോടി വായ്പ തുകയും 7.04കോടി കോടതിചെലവായും നൽകണമെന്ന് ഉത്തരവിട്ടിരുന്നു. എന്നാൽ ഇത് പാലിക്കാത്തതിനെ തുടർന്ന് ആസ്തി വെളിപ്പെടുത്തണമെന്ന് ആവശ്യപ്പെട്ട് ബാങ്കുകൾ വീണ്ടും കോടതിയെ സമീപിക്കുകയായിരുന്നു.
കോടതി ചെലവിനായി ആഭരണങ്ങൾ വിറ്റെന്നും ഇപ്പോൾ കഴിയുന്നത് ഭാര്യയുടെയും കുടുംബത്തിൻെറയും ചിലവിൽ ആണെന്നുമായിരുന്നു അനിൽ അംബാനിയുടെ വെളിപ്പെടുത്തൽ. അനിൽ അംബാനി നൽകിയ ഹർജിയും കോടതി പരിഗണിക്കും. എന്നാൽ ഇത് തുക മടക്കിത്തരാതിരിക്കാനുള്ള തന്ത്രമാണെന്നാണ് ചൈന ബാങ്കുകളുടെ ആരോപണം.
