വാഷിംഗ്ടൺ: ഡൊണാൾഡ് ട്രംപിനെ വിമർശിച്ച് മിഷേൽ ഒബാമ രംഗത്ത്. അമേരിക്കക്ക് ലഭിച്ച ഏറ്റവും മോശം പ്രസിഡന്റാണ് ഡൊണാൾഡ് ട്രംപെന്നാണ് മിഷേൽ ഒബാമ കുറ്റപ്പെടുത്തിയത്. മറ്റുള്ളവരോട് സഹാനുഭൂതി പ്രകടിപ്പിക്കാൻ കഴിവില്ലാത്ത പ്രസിഡന്റാണ് ട്രംപെന്നും മിഷേൽ പറഞ്ഞു.
യു.എസ് ഡെമോക്രാറ്റിക് നാഷനൽ കൺവെൻഷനെ അഭിസംബോധന ചെയ്ത് സംസാരിക്കവെയാണ് മിഷേലിന്റെ പരാമർശം. രാജ്യത്തിൻെറ പൊതുനന്മയെ കരുതി നവംബറില്‍ നടക്കുന്ന പ്രസിഡന്റ് തെരഞ്ഞെടുപ്പില്‍ ട്രംപിനെ പരാജയപ്പെടുത്തേണ്ടത് അനിവാര്യമാണെന്നും മിഷേൽ പറഞ്ഞു. ഈ തെരഞ്ഞെടുപ്പില്‍ മാറ്റം സംഭവിച്ചില്ലെങ്കില്‍ കാര്യങ്ങള്‍ കൈവിട്ടുപോകുമെന്നും മിഷേല്‍ വ്യക്തമാക്കി.
ഏതെങ്കിലും തരത്തിലുള്ള നേതൃത്വത്തിനോ ആശ്വാസത്തിനോ സ്ഥിരതക്കോ വേണ്ടി വൈറ്റ് ഹൗസിലേക്ക് ഉറ്റുനോക്കുമ്പോൾ നമുക്ക് കാണാനാകുന്നത് അരാജകത്വവും വിഭജനവും സമാനുഭാവത്തിന്റെ അഭാവമാണെന്നും മിഷേൽ ഒബാമ തുറന്നടിച്ചു. ട്രംപ് നമ്മുടെ രാജ്യത്തിന്റെ മോശം പ്രസിഡന്റാണെന്നും അവർ കൂട്ടിച്ചേർത്തു.
