വെല്ലിംഗ്ടൺ: കൊറോണ വ്യാപനത്തിൻ്റെ പശ്ചാതലത്തിൽ ന്യൂസിലാൻഡിലെ പൊതുതെരഞ്ഞെടുപ്പ് മാറ്റിവച്ചതായി പ്രധാനമന്ത്രി ജസീന്ത ആര്‍ഡന്‍. സെപ്റ്റംബര്‍ 19 ന് നടത്താനിരുന്ന തെരഞ്ഞെടുപ്പ് ഒക്ടോബര്‍ 17ലേക്ക് മാറ്റിയതായി ജസീന്ത വാർത്താ സമ്മേളനത്തിൽ പ്രഖ്യാപിച്ചു.
ഇനി തീരുമാനത്തില്‍ മാറ്റമുണ്ടാകില്ലെന്നും പാര്‍ട്ടികള്‍ക്ക് പ്രചാരണം നടത്താനും തെരഞ്ഞെടുപ്പ് കമ്മീഷന് തയ്യാറെടുപ്പ് നടത്താൻ ആവശ്യത്തിന് സമയമുണ്ടെന്നും ജസീന്ത ആര്‍ഡേന്‍ പറഞ്ഞു.വിവിധ പാർട്ടി നേതാക്കളുമായി ചർച്ച നടത്തിയ ശേഷമാണ് തെരഞ്ഞെടുപ്പ് മാറ്റിവച്ച് പുതിയ തിയതി പ്രഖ്യാപിച്ചത്.
പ്രധാനമന്ത്രി ജസീന്ത ആർഡൻ്റെ ലേബർ പാർട്ടി തെരഞ്ഞെടുപ്പിൽ വിജയിക്കുമെന്ന് കഴിഞ്ഞ ദിവസത്തെ അഭിപ്രായ വോട്ടെടുപ്പ് വ്യക്തമാക്കിയിരുന്നു. ഈ സാഹചര്യത്തിൽ കൊറോണ വ്യാപനത്തിൻ്റെ പേരിൽ വോട്ടെടുപ്പ് മാറ്റിവയ്ക്കുവാന്‍ രാഷ്ട്രീയ എതിരാളികളുടെയും സഖ്യകക്ഷികളുടെയും സമ്മര്‍ദ്ദം പ്രധാനമന്ത്രി ജസീന്തയ്ക്കു നേരിടേണ്ടി വന്നു.
102 ദിവസത്തിനുശേഷം ന്യൂസിലാൻഡിൽ കൊറോണ കേസുകള്‍ ഉണ്ടാകുകയും ഇവിടെ ലോക്ഡൗൺ പ്രഖ്യാപിക്കുകയും ചെയ്തിരുന്നു. കൊറോണ പോസിറ്റീവ് കേസുകൾ വർദ്ധിച്ചുകൊണ്ടിരിക്കുകയാണെന്ന് കഴിഞ്ഞ ദിവസം ആരോഗ്യ വകുപ്പ് അധികൃതരും അറിയിച്ചിരുന്നു.
ഞായറാഴ്ച ന്യൂസിലാന്റിൽ ആകെ 69 സജീവ കേസുകളാണ് ഉണ്ടായിരുന്നത്. മാറിയ സാഹചര്യത്തിൽ മാസ്കുകളുടെ വിതരണം ഉറപ്പാക്കാൻ സർക്കാർ ശ്രമിക്കുന്നുണ്ടെന്നും അവ നിലവിൽ നിർബന്ധമല്ലെന്നും. ആരോഗ്യമന്ത്രി ജോൺ ഹിപ്കിൻസ് ഞായറാഴ്ച വാർത്താ സമ്മേളനത്തിൽ പറഞ്ഞു,
