കൊച്ചി: എറണാകുളത്ത് ശക്തമായ കാറ്റും മഴയും തുടരുന്നു. ജില്ലയിലെ താഴ്ന്ന പ്രദേശങ്ങളിലെ കോളനികളിലടക്കം വീടുകളിൽ വെള്ളം കയറാൻ തുടങ്ങി. ആലുവ ശിവരാത്രി മണപ്പുറത്തും വെള്ളം കയറി.ശിവക്ഷേത്രം പൂർണമായും വെള്ളത്തിലായി. പെരിയാറിൽ ജല നിരപ്പ് ഉയർന്നു. ഏലൂരിൽ 85 കുടുംബങ്ങളെ മാറ്റിപാർപ്പിച്ചു. ജില്ലയിൽ ഇതിനകം നിരവധി ക്യാമ്പുകൾ തുറന്നിട്ടുണ്ട്. വേലിയേറ്റത്തോടെ ജല നിരപ്പ് ഉയരുമെന്ന് സൂചനയുണ്ട്. കടൽക്ഷോഭമുള്ളതിനാൽ മഴ വെള്ളം കടലിലേക്ക് ഒഴുകി പോകാത്തത് ജലനിരപ്പ് ഉയരാൻ കാരണമായിട്ടുണ്ട്.
2018 ലെ വെള്ളപൊക്കത്തെ ഓർമ്മിപ്പിക്കുന്ന രീതിയിലാണ് പെരിയാറിൽ ജലമുയരുന്നതെന്ന് സമീപവാസികൾ പറയുന്നു. ആലുവയിൽ കൊറോണ ഭീതിക്കൊപ്പം ജലനിരപ്പ് ഉയർന്നത് ജനങ്ങളെ ആശങ്കയിലാഴ്ത്തി.
ഒൻപതാം തിയതി വരെ സംസ്ഥാനത്ത് അതിശക്തമായമഴ തുടരാൻ സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. വടക്കൻ കേരളത്തിലും മധ്യ കേരളത്തിലും മഴ കനക്കും. ചില ജില്ലകളിൽ അതിതീവ്ര മഴയ്ക്ക് സാധ്യതയെന്നും മുന്നറിയിപ്പ്. ഇന്ന് മലപ്പുറത്ത് റെഡ് അലേർട്ട് പ്രഖ്യാപിച്ചു.എറണാകുളം, ഇടുക്കി, തൃശൂർ, പാലക്കാട്, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ ഓറഞ്ച് അലേർട്ടും ആലപ്പുഴ കോട്ടയം ജില്ലകളിൽ യെല്ലോ അലേർട്ടും പ്രഖ്യാപിച്ചു.
നാളെ പതിനാല് ജില്ലകളിലും മഴ മുന്നറിയിപ്പ് നൽകിയിട്ടുണ്ട്. മലയോര മേഖലകളിൽ ജാഗ്രത നിർദ്ദേശം പുറപ്പെടുവിച്ചു.ഡാമുകളിലേക്കുള്ള നീരൊഴുക്ക് വർധിച്ചു. വടക്കൻ കേരളത്തിൽ പല നദികളുടെ കൈവഴികളും കരകവിഞ്ഞ് ഒഴുകുന്നു.അതിശക്തമായ മഴയുടെ പശ്ചാത്തലത്തിൽ പൊതുജനങ്ങൾ ജാഗ്രത പാലിക്കണമെന്നും സർക്കാരും ജില്ലാ ഭരണകൂടവും നൽകുന്ന സുരക്ഷാനിർദ്ദേശങ്ങൾ കർശനമായി പാലിക്കണമെന്നും മുഖ്യമന്ത്രി പിണറായി വിജയൻ പറഞ്ഞു.
താഴ്ന്ന പ്രദേശങ്ങൾ, നദീതീരങ്ങൾ, ഉരുൾപൊട്ടൽമണ്ണിടിച്ചിൽ സാധ്യതയുള്ള മലയോര പ്രദേശങ്ങൾ തുടങ്ങിയ ഇടങ്ങളിലുള്ളവർ അതീവ ജാഗ്രത പാലിക്കണം.കേരള തീരത്ത് ഉയർന്ന തിരമാലയ്ക്കും അതിശക്തമായ കാറ്റിനും സാധ്യതയുണ്ട്. കടലാക്രമണത്തിന് സാധ്യതയുള്ളതിനാൽ തീരദേശവാസികൾ ജാഗ്രത പാലിക്കണം. കേരള തീരത്ത് നിന്ന് മത്സ്യതൊഴിലാളികൾ കടലിൽ പോകരുതെന്ന് കർശന മുന്നറിയിപ്പ് നൽകിയിട്ടുണ്ട്.
