തിരുവനന്തപുരം: രാജ്യദ്രോഹക്കുറ്റത്തിന് നേതൃത്വം കൊടുത്തത് മുഖ്യമന്ത്രിയുടെ ഓഫീസാണെന്ന് പ്രതിപക്ഷ നേതാവ് രമേശ് ചെന്നിത്തല. മുഖ്യമന്ത്രിക്ക് ധാർമികത ഇല്ല. സോളാർ കേസിലേതുപോലെ ജുഡീഷൽ അന്വേഷണം നടത്താൻ മുഖ്യമന്ത്രി തയാറുണ്ടോയെന്ന് ചെന്നിത്തല പിണറായിയെ വെല്ലുവിളിച്ചു.
മുഖ്യമന്ത്രി രാജിവയ്ക്കണമെന്നും സ്വർണക്കടത്തിൽ മുഖ്യമന്ത്രിയുടെ ഓഫീസിന്‍റെ പങ്കിനെക്കുറിച്ചും സർക്കാരിന്‍റെ അഴിമതികളെക്കുറിച്ചും സി ബിഐ അന്വേഷിക്കണമെന്നാവശ്യപ്പെട്ട് യുഡിഎഫ് എംഎൽഎ മാരും എംപിമാരും നടത്തുന്ന ‘സ്പീക്കപ്പ് കേരള’ സത്യഗ്രഹത്തിന് മുമ്പ് മാധ്യമങ്ങളോട് സംസാരിക്കവെയാണ് പ്രതിപക്ഷ നേതാവ് ഈ ആവശ്യം ഉന്നയിച്ചത്.
പ്രതിപക്ഷ നേതാവ് രമേശ് ചെന്നിത്തല, മുൻമുഖ്യമന്ത്രി ഉമ്മൻ ചാണ്ടി, കെപിസിസി പ്രസിഡന്‍റ് മുല്ലപ്പള്ളി രാമചന്ദ്രൻ, പി കെ കുഞ്ഞാലിക്കുട്ടി, പിജെ ജോസഫ് ഉൾപ്പെടെയുള്ള കോൺഗ്രസ്, യുഡിഎഫ് നേതാക്കളും കെപിസിസി, ഡിസിസി ഭാരവാഹികളും പ്രതിഷേധ സമരത്തിൽ പങ്കെടുക്കുന്നുണ്ട്. വീടുകളിലും ഓഫീസുകളിലുമാണ് സമരം.
