ശ്രീനഗർ: ബിജെപി നേതാവിനെയും പിതാവിനെയും സഹോദരനെയും കശ്മീരിൽ തീവ്രവാദികൾ വെടിവച്ച് കൊലപ്പെടുത്തി. സംഭവത്തിൽ വീഴ്ച വരുത്തിയ എട്ട് വ്യക്തിഗത സുരക്ഷാ ഉദ്യോഗസ്ഥരെ പോലീസ് അറസ്റ്റ് ചെയ്തു
ബുധനാഴ്ച വൈകിട്ട് ശ്രീനഗറിൽ നിന്ന് 60 കിലോമീറ്റർ വടക്ക് ബന്ദിപ്പൂരിലെ കടയിലാണ് തീവ്രവാദി ആക്രമണം ഉണ്ടായത്. ബന്ദിപ്പൂർ ജില്ലാ മുൻ ബിജെപി പ്രസിഡന്റായിരുന്ന ഷെയ്ഖ് വസീം ബാരി, പിതാവ് ബഷീർ അഹ്മദ്, സഹോദരൻ ഉമർ എന്നിവരെയാണ് തീവ്രവാദികൾ വെടിവച്ചു കൊന്നത്.
2019 ഫെബ്രുവരിയിൽ പുൽവാമ ഭീകരാക്രമണം നടത്തിയ ജയ്ഷ്-ഇ-മുഹമ്മദ് തീവ്രവാദികൾക്ക് പിന്തുണ നൽകിയതിന് ഒരു യുവാവിനെ എൻഐഎ അറസ്റ്റ് ചെയ്തതിന് തൊട്ടുപിന്നാലെയാണ് സംഭവം. കേസുമായി ബന്ധപ്പെട്ട് അറസ്റ്റിലായ ഏഴാമത്തെ വ്യക്തിയാണ് പുൽവാമ ജില്ലയിലെ കക്പോറ നിവാസിയായ ബിലാൽ അഹമ്മദ് കുച്ചെ.
പുൽവാമ ഭീകരാക്രമണം ആസൂത്രണം ചെയ്യുന്നതിനിടയിൽ ജയ്ഷ്-ഇ-മുഹമ്മദ് തീവ്രവാദികൾക്ക് അഭയം നൽകുകയും പാകിസ്ഥാനിലെ അവരുടെ ഹാൻഡ്‌ലർമാരുമായി ആശയവിനിമയം നടത്തുന്നതിന് ഉയർന്ന നിലവാരമുള്ള ഫോണുകൾ ബിലാൽ നൽകുകയും ചെയ്തിരുന്നു. ഇയാളുടെ
മൊബൈൽ ഫോണുകളിലൊന്നാണ് പുൽവാമ ബോംബർ ആദിൽ അഹമ്മദ് ദാർ തന്റെ അവസാന വീഡിയോ റെക്കോർഡുചെയ്യാൻ ഉപയോഗിച്ചതെന്ന് എൻഐഎ അറിയിച്ചു.
