തിരുവനന്തപുരം: തദ്ദേശ തെരഞ്ഞെടുപ്പിനുളള വോട്ടര്‍പട്ടിക ഇന്ന് പ്രസിദ്ധീകരിക്കും. ആഗസ്റ്റിൽ തെരഞ്ഞെടുപ്പിന് മുമ്പും വോട്ടര്‍പട്ടിക വീണ്ടും പുതുക്കും. 13 ലക്ഷം പുതിയ വോട്ടര്‍മാരാണ് ഉണ്ടാവുക. ഇന്ന് പുറത്തിറക്കുന്ന പട്ടികയില്‍ ഉള്‍പ്പെടാതെ പോകുന്നവര്‍ക്ക് ഇനിയുളള ദിവസങ്ങളില്‍ അപേക്ഷ നല്‍കാം.
2015ല്‍ 2.51 കോടി വോട്ടര്‍മാരാണ് ആകെയുണ്ടായിരുന്നത്. വോട്ടര്‍മാരുടെ എണ്ണത്തിന് ആനുപാതികമായി തദ്ദേശ സ്ഥാപനങ്ങളിലെ പോളിങ് സ്‌റ്റേഷന്‍ ക്രമീകരിക്കും. കോവിഡിന്റെ പശ്ചാത്തലത്തില്‍ പോളിങ് സമയം ഒരു മണിക്കൂര്‍ കൂടി നീട്ടുന്നതിന് സംസ്ഥാന തെരഞ്ഞെടുപ്പ് കമ്മീഷന്‍ ആലോചിക്കുന്നുണ്ട്. ഇതിനായി പഞ്ചായത്ത് രാജ് നിയമത്തില്‍ ഭേദഗതി വേണ്ടി വരും. 2015ലെ വോട്ടര്‍പട്ടിക അടിസ്ഥാനമാക്കി പുതുക്കിയ കരട് പട്ടിക ജനുവരി 20ന് പ്രസിദ്ധീകരിച്ചിരുന്നു. ലോക്ക്ഡൗണ്‍ സാഹചര്യത്തിലാണ് അന്തിമ പട്ടിക പ്രസിദ്ധീകരിക്കുന്നത് നീണ്ടത്.
