തിരുവനന്തപുരം: വർക്കല സ്വദേശിയുടെ മൃതദേഹമാണ് ശ്രീകാര്യത്ത് തല്ലിക്കൊന്ന്കെട്ടിത്തൂക്കിയ നിലയിൽ കണ്ടെത്തിയതെന്ന് പൊലീസ്. വർക്കലയിൽ കഴിഞ്ഞ ദിവസം ഉണ്ടായ സംഘർഷത്തിൽ പരുക്കേറ്റ് മെഡിക്കൽ കോളജിൽ ചികിത്സയിലായിരുന്ന ആളാണ് മരിച്ചതെന്ന് പൊലീസ് സ്ഥിരീകരിച്ചു. കൊലപാതകമാണെന്നാണ് പൊലീസിന്‍റെ പ്രാഥമിക നിഗമനം.
ആദ്യം ആത്മഹത്യയാണെന്നാണ് കരുതിയത്. എന്നാൽ, മൃതദേഹത്തിന്‍റെ മുഖത്തും ശരീരത്തിലും മുറിവുകൾ കണ്ടെത്തിയതോടെ കൊലപാതകമാണെന്ന സംശയം ഉയരുകയായിരുന്നു. സമീപത്തെ ആളൊഴിഞ്ഞ വീടിന്റെ ടെറസിലും രക്തക്കറ കണ്ടെത്തിയത് ദുരൂഹത ഏറ്റുന്നു. എന്നാല്‍, ഇക്കാര്യത്തിൽ ഇതുവരെ സ്ഥിരീകരണം ഉണ്ടായിട്ടില്ല.
കൊന്നതിന് ശേഷം കെട്ടിത്തൂക്കിയതാകാം എന്നാണ് പൊലീസിന്‍റെ നിഗമനം. ഇൻക്വസ്റ്റും പോസ്റ്റ്‌മോർട്ടവും നടത്തിയ ശേഷം മരണകാരണത്തിൽ സ്ഥിരീകരണം ഉണ്ടാകും എന്ന് പൊലീസ് അറിയിച്ചു.
ശ്രീകാര്യം ജംഗ്ഷനോട് ചേർന്ന സ്വകാര്യ ബാങ്കിന് സമീപത്തെ ആളൊഴിഞ്ഞ വീടിനോട് ചേർന്ന പ്രദേശത്താണ് പുരുഷന്റെ മൃതദേഹം കെട്ടിത്തൂക്കിയ നിലയിൽ കണ്ടെത്തിയത്.