വയനാട്: കുളിക്കടവിലെത്തിയ മകളെയും കൂട്ടുകാരിയെയും അപമാനിച്ചത് ചോദ്യം ചെയ്ത പിതാവിന് സിപിഎം പ്രവര്‍ത്തകരുടെ ക്രൂരമര്‍ദനം. വയനാട് മാനന്തവാടി മുതിരേരിയിൽ ഇക്കഴിഞ്ഞ ദിവസമാണ് കേസിനാസ്പദമായ സംഭവം.
പുഴയില്‍ കുളിക്കാനിറങ്ങിയ പെണ്‍കുട്ടിയുടെയും കൂട്ടുകാരിയുടെയും ചിത്രം സിപിഎം പ്രവര്‍ത്തകര്‍ ഫോണില്‍ പകര്‍ത്തുകയും ഇവരെ കമന്‍റടിക്കുകയും ചെയ്തിരുന്നു. സംഭവത്തെക്കുറിച്ച്‌ ചോദിക്കാനെത്തിയപ്പോഴാണ് പെണ്‍കുട്ടിയുടെ അച്ഛനെ സിപിഎം പ്രവര്‍ത്തകര്‍ ക്രൂരമായി മര്‍ദിക്കുകയും പല്ല് അടിച്ചു കൊഴിക്കുകയും ചെയ്തത്. സംഭവം നടന്ന് ദിവസങ്ങള്‍ പിന്നിട്ടിട്ടും ഇവരെ അറസ്റ്റ് ചെയ്തിട്ടില്ല. ഇവര്‍ ഒളിവിലാണെന്നാണ് പോലീസ് നല്‍കുന്ന വിശദീകരണം. എന്നാല്‍ പോലീസ് ഒത്തുകളിക്കുകയാണെന്നും സംഭവത്തില്‍ ഉന്നത ഇടപെടല്‍ നടന്നിട്ടുണ്ടെന്നും പെണ്‍കുട്ടിയുടെ കുടുംബം ആരോപിച്ചു. സംഭവം നടന്നതിന്‍റെ പിറ്റേന്ന് പൊലീസെത്തി മൊഴിയെടുത്തു. വീണ്ടും ഒരുദിവസത്തിന് ശേഷമാണ് പെൺകുട്ടികളുടെ മൊഴി പൊലീസ് രേഖപ്പെടുത്തിയത്.
അതേസമയം പരിക്കേറ്റ പെൺകുട്ടിയുടെ അച്ഛനെ മാനന്തവാടിയിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ലോക്ക് ഡൗണായതിനാല്‍ വീട്ടില്‍ വിശ്രമിക്കാനായിരുന്നു നിർദേശം. അഞ്ച് പേർക്കുമെതിരെ ജാമ്യമില്ലാ കുറ്റം ചുമത്തിയെന്നും പ്രതികൾക്കായി തിരച്ചില്‍ തുടരുന്നെന്നും മാനന്തവാടി പൊലീസ് പറഞ്ഞു. സംഭവത്തിൽ സംസ്ഥാന വനിതാ കമ്മീഷൻ സ്വമേധയാ കേസെടുത്തു.
