സോള്‍: കിം ജോങ് ഉൻ മരിച്ചു!. ഹാങ്‌സ്യാനിലെ ആഡംബര റിസോര്‍ട്ടില്‍ കിം താമസിക്കുന്നു!. കിമ്മിൻ്റെ പ്രശസ്തമായ പച്ച നിറത്തിലുള്ള ആഡംബര ട്രെയിന്‍ തീരദേശ നഗരമായ ഹ്യാങ്‌സാനില്‍ എത്തി!. ഇങ്ങനെ പലതരത്തിലാണ് ലോകത്ത് വർത്തകൾ പ്രചരിക്കുന്നത്. ഇതിൽ ഏതാണ് ശരിയായ വാർത്ത എന്നത് ഉത്തര കൊറിയക്ക് മാത്രമറിയാം.
കിം ജോങ് ഉന്നിനെ പറ്റി അവസാനം വന്ന വാർത്ത കിമ്മിൻ്റെ പ്രശസ്തമായ പച്ച നിറത്തിലുള്ള ആഡംബര ട്രെയിന്‍ തീരദേശ നഗരമായ ഹ്യാങ്‌സാനില്‍ എത്തിയതായി സാറ്റലൈറ്റ് ചിത്രങ്ങള്‍ പുറത്തു വന്നു എന്നതാണ്. 38 നോര്‍ത്ത് വെബ്‌സൈറ്റിലാണ് ട്രെയിനിന്റെ സാറ്റലൈറ്റ് ചിത്രങ്ങള്‍ പ്രസിദ്ധീകരിച്ചത്. ഹാങ്‌സ്യാനിലെ ആഡംബര റിസോര്‍ട്ടില്‍ കിം താമസിക്കുന്നുണ്ടെന്ന വാര്‍ത്തകള്‍ പുറത്ത് വന്നതിന് പിന്നാലെയാണ് കിം കുടുംബത്തിന്റെ പച്ച ട്രെയിന്‍ കണ്ടെത്തിയത്.
ഒൗദ്യോഗിക സ്ഥിരീകരണമില്ലാത്ത കിം മരിച്ചെന്ന വാർത്തകളും ചിത്രങ്ങളും സമൂഹ മാധ്യമങ്ങളിൽ പ്രചരിക്കുന്നുണ്ട്. കഴിഞ്ഞദിവസം കിമ്മിന്റെ ഹൃദയ ശസ്ത്രക്രിയ കഴിഞ്ഞതായി വാർത്തൾ വന്നിരുന്നു. അതിനു പിന്നാലെയാണ് കിമ്മിന്റെ ശാരീരിക അവസ്ഥകളെക്കുറിച്ചുള്ള ഉൗഹാപോഹങ്ങൾ പ്രചരിച്ചു തുടങ്ങിയത്.
മസ്തിഷ്ക മരണം സംഭവിച്ചുവെന്നായിരുന്നു ആദ്യ വാർത്തകൾ. എന്നാൽ ഇക്കാര്യങ്ങൾക്കൊന്നിനും ഒൗദ്യോഗിക സ്ഥിരീകരണമില്ലായിരുന്നു. അതുകൊണ്ടുതന്നെ ഇപ്പോൾ പ്രചരിക്കുന്ന വാർത്തകളുടെ വിശ്വാസ്യതയും ചോദ്യം ചെയ്യപ്പെടുന്നുണ്ട്.
ഹോങ്കോങ് സാറ്റലൈറ്റ് ടിവി ഉപ ഡയറക്ടറുടെ സോഷ്യൽ മീഡിയ അക്കൗണ്ടിലാണ് കിമ്മിന്റെ മരണ വാർത്ത വീണ്ടും പ്രത്യക്ഷപ്പെട്ടത്. മുഖമൊഴികെ ദേഹം മൂടിയ നിലയിൽ കിടക്കുന്ന കിമ്മിന്റെ ചിത്രങ്ങളും ഒപ്പം പ്രചരിച്ചു. ട്വിറ്ററിലും പിന്നാലെ ഫേസ്ബുക്ക് ഉൾപ്പെടെ സമുഹ മാധ്യങ്ങളിലും വാർത്തയും ചിത്രങ്ങളും പ്രചരിച്ചതോടെയാണ് അന്താരാഷ്ട്ര മാധ്യമങ്ങൾ ഉൾപ്പെടെ കടുത്ത ആശയക്കുഴപ്പത്തിലായത്.
നേരത്തെ, കിമ്മിന്റെ ചികിത്സക്കായി ഉപദേശം നൽകാനായി ചൈന വിദഗ്ധ സംഘത്തെ ഉത്തര കൊറിയയിലേക്ക് അയച്ചതായി റിപ്പോർട്ടുകളുണ്ടായിരുന്നു. റോയിട്ടേഴ്സാണ് ഇക്കാര്യം റിപ്പോർട്ട് ചെയ്തത്. ഡോക്ടർമാർ, ഉദ്യോഗസ്ഥർ എന്നിവർക്കൊപ്പം കമ്യൂണിസ്റ്റ് പാർട്ടിയുടെ അന്താരാഷ്ട്ര ലെയ്സണ്‍ വിഭാഗത്തിലെ മുതിർന്ന അംഗം ഉൾപ്പെടെയാണ് വ്യാഴാഴ്ച പോയതെന്നും റിപ്പോർട്ടിൽ പറയുന്നു. അതേസമയം, ഇക്കാര്യത്തിൽ ചൈനീസ് വിദേശകാര്യ മന്ത്രാലം പ്രതികരിച്ചിരുന്നില്ല.
കിം ഗുരുതരാവസ്ഥയിലാണെന്ന് ദക്ഷിണ കൊറിയൻ വാർത്താ വെബ്സൈറ്റായ ഡെയിലി എൻകെയാണ് ആദ്യം റിപ്പോർട്ട് ചെയ്തത്. ഏപ്രിൽ 12ന് ഹൃദയ ശസ്ത്രക്രിയക്കു വിധേയനായ കിമ്മിന്റെ ആരോഗ്യസ്ഥിതി മോശമായി എന്നായിരുന്നു റിപ്പോർട്ട്. പിന്നാലെ കിമ്മിന് മസ്തിഷ്ക മരണം സംഭവിച്ചെന്ന തരത്തിൽ വിവിധ ഇടങ്ങളിൽനിന്ന് സ്ഥിരീകരിക്കാത്ത വാർത്തകൾ വന്നിരുന്നു.
ഏപ്രില്‍ 21, 23 തീയതികളില്‍ കമ്മിൻ്റെ ട്രെയിന്‍ നഗരത്തിലെത്തിയതായാണ് സ്ഥിരീകരണം. ട്രെയിന്‍ സ്‌പോട് ചെയ്ത വാര്‍ത്ത ബിബിസി അടക്കം നിരവധി അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. കിമ്മിന്റെ കുടുംബത്തിന് മാത്രമാണ് ഈ ട്രെയിന്‍ ഉപയോഗിക്കാനുള്ള അവകാശം.
