കൊച്ചി: മുഖ്യമന്ത്രി പിണറായി വിജയന്റെ മകള്‍ക്ക് കൊറോണ വിവര കൈമാറ്റത്തിന്റെ പേരില്‍ വിവാദമായ സ്പ്രിംഗ്ലര്‍ കമ്പനി ഉടമ രാജി തോമസുമായി അടുത്ത ബന്ധമുണ്ടെന്ന് പെരുമ്പാവൂര്‍ എംഎല്‍എയും കോണ്‍ഗ്രസ് നേതാവുമായ എല്‍ദോസ് കുന്നപ്പിള്ളില്‍. അടുത്തിടെ മുഖ്യമന്ത്രിയുടെ മകള്‍ അമേരിക്കയിലുള്ള രാജി തോമസിന്റ വീട്ടില്‍ ആറു തവണ സന്ദര്‍ശനം നടത്തിയെന്ന് എല്‍ദോസ് ഫെയ്‌സ്ബുക്ക് കുറിപ്പില്‍ പറഞ്ഞു. ഇതിന്റെ വിവരങ്ങള്‍ പുറത്തുവിടുമെന്നും എല്‍ദോസ് പറഞ്ഞു.
എല്‍ദോസിന്റെ കുറിപ്പ്:
മുഖ്യമന്ത്രിയുടെ മകള്‍ വീണയ്ക്ക് സ്പ്രിങ്ക്‌ളര്‍ എംഡി രാജി തോമസുമായുള്ളത് അടുത്ത ബന്ധം.
കഴിഞ്ഞ ഏതാനും നാളുകള്‍ക്കിടയില്‍ രാജി തോമസിന്റെ അമേരിക്കയിലെ ന്യൂജഴ്‌സിയിലുള്ള വസതിയില്‍ വീണ സന്ദര്‍ശിച്ചത് ആറുതവണയാണ്.
അന്വേഷണ ഏജന്‍സികള്‍ വീണയുടെ പാസ്‌പോര്‍ട് പരിശോധിക്കാന്‍ തയ്യാറാകണം.
ഇതോടനുബന്ധിച്ചുള്ള കൂടുതല്‍ വിവരങ്ങള്‍ എന്റെ കയ്യിലുണ്ട്. അവ പുറത്ത് വിടുന്നതായിരിക്കും.