തിരുവനന്തപുരം: ഞായറാഴ്ച മുതല്‍ പുനരാരംഭിക്കാനിരുന്ന ഭാഗ്യക്കുറി നറുക്കെടുപ്പ് വീണ്ടും നീട്ടി. 19 മുതല്‍ 26 വരെ നറുക്കെടുക്കാനിരുന്ന പൗര്‍ണമി (ആര്‍എന്‍ 435), വിന്‍വിന്‍ (ഡബ്ലിയു 557), സ്ത്രീശക്തി (എസ്‌എസ് 202), അക്ഷയ (എകെ 438), കാരുണ്യ പ്ലസ് (കഐന്‍ 309), നിര്‍മല്‍ (എന്‍ആര്‍ 166), പൗര്‍ണമി (ആര്‍എന്‍ 436) ഭാഗ്യക്കുറികള്‍ യഥാക്രമം അടുത്തമാസം 10, 13, 16, 19, 22, 25, 28 തീയതികളില്‍ നറുക്കെടുക്കും.
ഏപ്രില്‍ 28-ലേക്ക് നറുക്കെടുപ്പ് മാറ്റിയ സമ്മര്‍ ബമ്പര്‍ (ബിആര്‍ 72) ഭാഗ്യക്കുറി മെയ് 31ന് നറുക്കെടുക്കും. നേരത്തെ ഇതിനൊപ്പം നറുക്കെടുപ്പ് നിശ്ചയിച്ചിരുന്ന കാരുണ്യ (കെആര്‍ 441) (28.03.2020), വിന്‍വിന്‍ (ഡബ്ലിയു 558) (30.03.2020), സ്ത്രീശക്തി (എസ്‌എസ് 203) (31.03.2020) ഭാഗ്യക്കുറി ടിക്കറ്റുകള്‍ വില്പന നടത്തിയിട്ടില്ലാത്തതിനാല്‍ റദ്ദുചെയ്തു.
ആദ്യഘട്ടത്തില്‍ റദ്ദു ചെയ്ത ഏപ്രില്‍ ഒന്ന് മുതല്‍ 28 വരെയുള്ള ടിക്കറ്റുകള്‍ക്കൊപ്പം ഏപ്രില്‍ 29, 30 തീയതികളിലെ അക്ഷയ (എകെ 443), കാരുണ്യ പ്ലസ് (കഐന്‍ 314) ടിക്കറ്റുകള്‍ കൂടി റദ്ദാക്കി. ഇതിനു പുറമെ മേയ് മാസത്തെ മുഴുവന്‍ ടിക്കറ്റുകളും റദ്ദാക്കി. ഇതോടെ മാര്‍ച്ചില്‍ ഭാഗികമായും ഏപ്രില്‍, മേയ് മാസങ്ങളില്‍ പൂര്‍ണമായും ഭാഗ്യക്കുറി ടിക്കറ്റുകള്‍ റദ്ദുചെയ്തു. വിഷു ബമ്പര്‍ (ബിആര്‍ 73) ടിക്കറ്റും റദ്ദാക്കി.
