കൊച്ചി ∙ വിഷുത്തലേന്ന് സംസ്ഥാനത്തെ നഗരങ്ങളില്‍ വലിയ തിരക്ക്. ലോക്‌ഡൗണ്‍ വിലക്ക് മറികടന്ന് റോഡുകളിലും കടകള്‍ക്കുമുന്നിലും ജനക്കൂട്ടമെത്തി. പത്തനംതിട്ട നഗരത്തില്‍ ഗതാഗതത്തിരക്കാണ്. കോഴിക്കോട്ടും തൃപ്പൂണിത്തുറയിലും പത്തനംതിട്ടയിലും പൊലീസ് സ്ഥിതി നിയന്ത്രിക്കാന്‍ ശ്രമിക്കുന്നുണ്ട്. ദേശീയപാതയിലും കഴിഞ്ഞ ദിവസങ്ങളെക്കാൾ കൂടുതല്‍ വാഹനങ്ങള്‍ ഓടുന്നുണ്ട്.
കോഴിക്കോട് പാളയം മാര്‍ക്കറ്റില്‍ തിരക്ക് കൂടിയതോടെ പൊലീസ് നടപടി കര്‍ശനമാക്കി. പ്രതിസന്ധി എന്തായാലും ആഘോഷം ഒഴിവാക്കാനാകില്ലെന്ന നിലപാടിലായിരുന്നു പലരും. നിയന്ത്രണങ്ങളും കരുതലും തുടരുമ്പോഴും വര്‍ഷത്തിലൊരിക്കലുള്ള ആഘോഷം ഒഴിവാക്കാനാകില്ല. അത്യാവശ്യ സാധനങ്ങള്‍ വാങ്ങി വേഗത്തില്‍ മടങ്ങുകയായിരുന്നു പലരും.
തിരക്കേറിയപ്പോള്‍ സാമൂഹിക അകലം പാലിക്കണമെന്നും നടപടിയുണ്ടാകുമെന്നും പൊലീസ് പലതവണ മുന്നറിയിപ്പ് നല്‍കി. മുഖാവരണമില്ലാതെ കച്ചവടക്കാരെപ്പോലും ചന്തയിലേക്ക് കയറ്റാതെ പൊലീസ് നിയന്ത്രണം കര്‍ക്കശമാക്കിയപ്പോള്‍ തിരക്ക് കുറ‍ഞ്ഞു. പച്ചക്കറി വിലയില്‍ കാര്യമായ കുറവുണ്ടെങ്കിലും നാലിലൊന്ന് വില്‍പന മാത്രമെന്ന് കച്ചവടക്കാര്‍.
മലബാറിന്റെ പ്രധാന ആഘോഷങ്ങളിലൊന്നായ വിഷുവിന് പച്ചക്കറിയും പലചരക്ക് കടകളും മാത്രമാണ് തുറന്നിട്ടുള്ളത്. വസ്ത്ര വിപണിക്കുള്ള നിയന്ത്രണത്തില്‍ പലരും നിരാശയിലാണ്.