ന്യൂയോർക്ക്: ലോകത്ത് കൊറോണ വൈറസ് ബാധിച്ച് മരിച്ചവരുടെ എണ്ണം 88,000 കടന്നു. 88,323 പേരാണ് ലോകത്താകമാനം കൊറോണ ബാധിച്ച് മരിച്ചത്. കൊറോണ രോഗികളുടെ എണ്ണം 15 ലക്ഷവും കടന്നു. 15,08,965 ഇതുവരെ രോഗം സ്ഥിരീകരിച്ചു. ഇതിൽ 3,29,632 പേർ മാത്രമാണ് രോഗവിമുക്തി നേടിയത്.
കഴിഞ്ഞ 24 മണിക്കൂറിനിടെ ലോകത്ത് 6,287 പേരാണ് മരിച്ചത്. അമേരിക്കയിലാണ് കൂടുതൽ മരണങ്ങൾ റിപ്പോർട്ട് ചെയ്തത്. 1,824 പേരാണ് 24 മണിക്കൂറിനിടെ ഇവിടെ മരിച്ചത്. ഇതോടെ അമേരിക്കയിൽ മരണസംഖ്യ 14,665 ആ‍യി. 4,27,079 പേർക്കാണ് ഇവിടെ കൊറോണ സ്ഥിരീകരിച്ചത്.
കഴിഞ്ഞ 24 മണിക്കൂറിനിടെ ബ്രിട്ടനിൽ 938 മരണങ്ങളും റിപ്പോർട്ട് ചെയ്തു. സ്പെയിനിൽ 747 പേരും ഇറ്റലിയിൽ 542 പേരും രോഗബാധയെ തുടർന്ന് മരണപ്പെട്ടു. ഇന്ത്യയിൽ 18 മരണങ്ങളും റിപ്പോർട്ട് ചെയ്തു.
ഏറ്റവുമധികം കൊറോണ മരണമുണ്ടായ രാജ്യം ഇറ്റലിയാണ്. 1,39,422 പേർക്കു രോഗം ബാധിച്ചതിൽ 17,669 പേർ മരിച്ചു. 1,46,690 പേർക്കു കൊറോണ ബാധിച്ച സ്പെയിൻ ആണ് മരണനിരക്കിൽ രണ്ടാമത്. ഇവിടെ 14,673 പേർക്കു ജീവൻ നഷ്ടപ്പെട്ടു. 938 പേർ ഒറ്റ ദിവസത്തിനിടെ മരണപ്പെട്ട ബ്രിട്ടനിലും കാര്യങ്ങൾ കൈവിട്ട മട്ടാണ്. 60,733 പേർക്കാണു രോഗം ബാധിച്ചത്. മരിച്ചവരുടെ ആകെ എണ്ണം 7097. ഫ്രാൻസിൽ 1,12,950 പേർക്കു രോഗം ബാധിച്ചു, മരണം 10,869. ജർമനിയിൽ 1,09,702 പേർക്കു രോഗം ബാധിച്ചു, മരണം 2105.
ചൈനയിൽ 81,802 പേർക്കാണു രോഗം ബാധിച്ചത്, മരണം 3333. ഇറാനിൽ 64,586 പേരാണു രോഗബാധിതരായത്, 3993 പേർ മരിച്ചു. രോഗബാധിതരുടെ എണ്ണം കുറവാണെങ്കിലും മരണനിരക്കിൽ ബെൽജിയവും നെതർലൻഡ്സും ആശങ്ക സൃഷ്ടിക്കുന്നു. 23,403 പേർക്കു രോഗം വന്ന ബെൽജിയത്തിൽ ആകെ മരണം 2240. നെതർലൻഡ്സിൽ 20,549 പേർക്കാണു രോഗം വന്നത്, മരണം 2248.
